Мультемидийнай центрать панжемаса ульсь Мордовиянь Оцюнясь Артём Здунов. «Интерактивнай тя музейти эряви арамс Мордовиянь эряйхненди и ошеряйхненди пуромома вастокс, башка од ломаттненди — тейнек шарьхкотькшнема, кода тиендеви лябось, кода сон повонды кудозонк, кода работайхть теплостанциятне. Тейнек важна, мезьста латцевихть тарифне, мезенкса минь панттама, коза тушендыхть тя ярмакне», - мярьгсь региононь руководительсь.
Артём Здунов китькстазе: республикать кемот «Т Плюс» ПАО-ть мархта деловой сотксонза, работась мольфтеви и Национальнай благосостояниянь фондть коряс. «Тейнек важна, што Россиянь Президентть поручениянц коряс минь получсетяма дополнительнай средстват, конатнень нолясаськ инфраструктурати», - отмечазе сон.
Тяниень пингть Мордовияса эряфс ётафневихть коммунальнай инфраструктурать одкстопнеманц коряс кафта проектт. Регионть столицаса одкстопневихть тепловой сетьтне, строяви насоснай станция и одкстоптовихть 12 центральнай тепловой пунктсь. Ладяф ни 5,5 вайгяльбе од тепловой станция ТЭЦ-2 районца, «Тавлань» 4-це микрорайонца. Стане жа мольфтеви центральнай тепловой сетьтнень реконструкциясна Саранскяйть северо-восточнай пялькссонза, полафневихть теплообменникне, сяда тов мольфтеви 200 Гкал/ч мощность мархта нососнай станциять строямац. 2023 кизоня «Т Плюс» компаниясь нолдась 1,2 миллиард цалковай тепловой сетьтнень одкстоптоманкса.
«Саранскяйсь — энергетикань оцю история мархта ош, конань инкса ули кода марямс гордость. Кой-коста ошеряйхне кржа мезе содайхть энергетикать колга, а тя пингть минь специалистоньке трудендайхть шинек-венек. Сяс пара мяльса ученттядязь музейть эса», - мярьгсь «Т Плюс» ПАО-ть Мордовскяй филиалонц директороц Петр Пашнин.
Почётнай инжихне ванозь мультимедийнай центрань площадкатнень. Экспозицияти сувси 14 аф фкя лацонь зона: панорамнай видеозал теплоэлектростанцияв экскурсия мархта, электростанциянь и тепловой пунктонь интерактивнай модельхне, регионть колга информация мархта зона, трехмернай инсталяцият, дополнительнай реальностень зонат. Специалисттне мялень салазь азондсть Саранскяйть теплоснабжениянь системанц колга, содафтозь энергетикать историянц мархта.
Интерактивнай центрась ульсь ни Самараса, Ивановаса, Оренбургса, Чебоксары ошса, Кировса, Саратовса, Балаковса, Ижевскяйса, Пермьса, Ульяновскяйса, Пензаса, Йошкар-Оласа. Мордовиясь арась 13-це регионкс, кона васьфтезе уникальнай проектть. Музейсь арьсеф аф фкя лацонь кизоса ломаттненди — тяса кармай интересна и шабатненди, и оцюфненди. Саранскяйса сон кармай 9 октябрть самс.
Мордовия Республикань Оцюнять пресс-службац