«Мялень кузня» - тя эрь кизонь благотворительнай акция, конань пингста ломаттне, конатнень мяльсна тиемс цебярь тефт, казендихть казнет и пяшкотькшнесазь мяльснон сятнень, кинди эряви лезкс.
Мордовиянь Оцюнясь Артём Здунов поладсь «Мечтай со мной» благотворительнай проектти и васетькшнесь котоце классонь тонафнить Дима Бурнаевонь мархта, штоба пяшкодемс сонь мяленц — улемс афкуксонь цирковой представленияса.
Дима Мордовиянь Оцюнять мархта васедемас сашендсь тядянц, Юлия Михайловнань мархта. Марса симсть чайда, корхнесть Димать тонафнеманц, интересонзон, урмать, кона музе цёрашабать несколька кизода инголе, тюреманц колга… Павазонди, аф Дима, аф сонь тядяц пря урмати аф макссихть — синь верондайхть аньцек цебярьс. Школьнай программать цёранясь тонаткшнесы ряцок кизосонза лия шабатнень мархта, шарфни мяль компьютернай налхксематненди.
И ёткшиста ни — 24 декабрьста — семьясь моли Нижняй Новгороду, вдь именна тоса Димати ули кода повомс браттнень Запашнайхнень цирковой шоузост.
Эряви азомс, волшебствась ашезь аделав Мордовиянь Оцюнять мархта васедемадовок меле — лисемста инжихнень васьфтезь Якшама Атясь и Ловонь стирнясь. Ёфксонь персонашнень кядьста Дима получась ламбама казне.
Мордовия Республикань Оцюнять пресс-службац