Полинать мялец, конань сон марса тядянц Ольга Александровнань мархта тяштезе проектть сайтса, ульсь эсь лацонне вете кизоса стирняти. Полинась анась Якшама Атять кядьста афкуксонь микроскоп! Артём Здуновонди шабась азозе — штоба ванондомс микропнень, цебярьхнень и кальдяфнень. Кода содавсь, Полинась емластокиге шарфни мяль унжанятнень-меснень тонафнемаснонды. Мордовиянь Оцюнясь макссь оценка тя мяльти и азсь мяль етафтомс мастер-класс идень садонь группати, коза якай Полинась, микробатнень каршес тюремать коряс специалисттнень эзда. «Саранскяйса ули Биохимик завод, тоса аноклакшнихть препаратт, конат тюрихть, кальдяв» бактериятнень и вируснень каршес. Арьсян, теенть ули мезень колга корхтамс. Марса опытт етафттада, кармай мялень салай!» - надияфтсь Артём Здунов.
А кудонь микроскопоц тяни Полинать ули — мялец пяшкодевсь! Республикань Оцюнять мархта васедемда меле инжить сяшкава мялец кеподсь, што сон моразе Якшама Атяти, конань васьфтезе Республикань Кудса, «Смуглянкать».
Мордовия Республикань Оцюнять пресс-службац