Отечествань аралаень шить карша Мордовияса ётась Россиянь воиттнень лятфнемаснонды панчфонь путомань церемониясь

Отечествань аралаень шить карша Мордовияса ётась Россиянь воиттнень лятфнемаснонды панчфонь путомань церемониясь

Отечествань аралаень шить минь сюконятама сембе поколениянь воиттненди. Сембонди, кит служасть и служайхть Родинати, ванфтсазь странаньконь суверенитетонц и национальнай интересонзон, кит полаткшнесазь славнай воинскяй койхнень. Сембе пингста рузонь солдатсь кемоста служась государствати, сувернитетонь гарантокс и странать территориальнай марстоньшинцты, арась виень и национальнай достоинствань символкс. Синь кемайхть эсь призванияснонды и присягаснонды, российскяй воиттне и тячивок ащихть кеме нежетьксокс минь Родинаньконди. Мордовиясь маряй кенярдема странаньконь аралаензон инкса, синь сяськомаснонды.

21 февральста, Отечествань аралаень шинь карша, Саранскяйса ётась воиттненди – Мордовияса шачфненди, конат шавовсть Великай Отечественнай войнань кизотнень, памятникти панчфонь путомань церемониясь. Памятникненди панчфт путсть Мордовия Республикань Оцюнясь Артём Здунов, МР-нь Госсобраниять Председателец Владимир Чибиркин, МР-ть коряс главнай федеральнай инспекторсь Анатолий Гулин, васенце вице-премьерсь Галина Лотванова, Саранскяень и Мокшэрзянь митрополитсь Зиновий, Саранск ошень округонь оцюнясь Игорь Асабин.

Стане жа путфтольхть панчфт специальнай военнай операциянь и Севернай Кавказонь регионца ётафтови операциянь участникнень, врачнень, конат макссихть лезкс СВО-нь зонаса, военнослужащайхнень и правоохранительнай оргаттнень, общественнай, ветеранскяй, военно-патриотическяй организациятнень и религиознай конфессиятнень, обороннай промышленностень предприятиятнень, кадеттнень, юноармеецнень и ВУЗнень эзда. 

Шавфнень колга мялямть ваноманкса азфоль кашт аф молезь ащемань минута, кайгсь ружейнай залпсь и Россиянь Гимнась.

Мордовия Республикань Оцюнять пресс-службац