Тяниень пингть Саранск ошень округть территорияса пассажирскяй перевозкатне тиендевихть 42 маршрутс коре, конатнень эзда 8 троллейбуснай и 34 автобуснай. «Горэлектротранс» муниципальнай предприятиясь обслуживандай 23 маршрут, лядыхне — частнай предприятиятнень и индивидуальнай предпринимательхнень кядьсот. «Частнай перевозчикне ноляйхть 180-да лама единица техника, - азозе Игорь Асабин. - Но илять и вайма шитнень частнай перевозчикне маршрутти лисемань планть аф пяшкотькшнесазь. Основной туфталсь — водительхнень аф сатнемасна, сон арась 32 процент».
- Тонць арнят автобусса, ванондсак? - кизефтезе Артём Здунов Игорь Асабинонь. - Кодама маршрутса улендеть?
- Кафксоце автобусса.
- Рабочай шиста ванк, эста сембось ули шарьхкотьф.
Штоба решандамс кадрань аф сатнемать мархта сотф кизефксть, «Горэлектротранссь» 1 январьста сявомок тись индексация водительхнень заработнай платаснонды 40 процентта, кондукторхненди — 20 процентта. Предприятиясь сявондьсыне эсь лангозонза водительхнень тонафнеманкса и лия ошень сотрудникненди эряма вастонь сиводемать пяльксонц компенсациянц.
Тяда башка, транспортть лаботанц цебярьгофтоманкса предприятияти фалу пачфневихть запасной частть.
Стане жа Саранск ошень округонь оцюнясь пачфтсь «Юбилейный» микрорайонть транспортнай обслуживаниянц колга. Панжевихть кафта од м маршрутт. Фкясь кармай микрорайонть потмоса. Омбоцесь ётай «Юбилейный» микрорайонть эзга Химмашста Юго-Западу: Косарева, Сущинскяень, Севастопольскяй, Октябрть 70 кизонц, Короленко, Волгоградскяй ульцятнень эзга 5№ больницять эзда сявомок Невскяень ульцянцты молемс.
Мордовия Республикань Оцюнять пресс-службац