Республикань Оцюнясь китькстазе, што тя кизефксне пяк важнайхть, сяс мес эздост ащи ломаттнень безопасностьсна. Сядонга лама прябалада уленди «Саранск — Сурское — Ульяновск» федеральнай трассать мархта. Тя направлениять эзга ламоц участкатне эрявихть петемс, но работатне 2022 кизоня активнайста ашесть вятев, мезть лангс Мордовиянь Оцюнясь аф весть шарфнезе Упродорть мяленц. Артём Здунов няфтезень Александр Нефедовонди авариянь оцю пелькс мархта участкатнень, конатнень эса лама лоткта. «Сяс мон эняльдян Правительствати, штоба минь Упродорть мархта улель работань планоньке, эрьда тяштьсаськ сонь», - пшкядсь республикань Оцюнясь Игорь Фрейдинонди..
«Москва — Нижний Новгород» Упродорть руководителенц тевонзон тиендисна надияфтсь сай кизоня сатомс нолдафть. «Тяниень пингть тонь вельдот ситуациясь полафтсь цебярь шири. 2023 кизоня минь тянь оду аф нолдасаськ и карматама активнайста работама. Кемокстаф ни контракт кота вайгяльбень кувалмоса васенце участкать петеманкса. Лувондсаськ фкя инь васенце направлениякс обеспечендамс сай кизоня Чамзинкати молемс кить петеманц», - мярьгсь Александр Нефедов.
Кирьфтамс аварийностть лездыхть фотовидеофиксациянь комплексневок, конат кармайхть латцевома федеральнай трассатнень лангса. Тяда башка, минь рамаме мобильнай вете комплекст, конат стане жа кармайхть федеральнай трассатнень лангса», - азозе Игорь Фрейдин.
Стане жа совещанияса корхтафоль Мордовиять столицанц севернай объездонц петеманц коряс платтнень колга.
Тяда башка, Мордовиянь Оцюнясь шарфтсь мяль китнень качественнайста кирдемаснон лангс, тяконь лувксса тялонь пингть. Тядде обслуживондаманкса контракт кемокстаф тястоконь компания мархта, и тя максси надияма, што китнень мельге кармай вановома сяда парста. Нинге фкя важнай моментсь: «Москва — Нижний Новгород» Упрдорть панжи Саранскяйса филиал, мезсь стане жа лезды цебярьгофтомс федеральнай китнень кирдемаса.
Мордовия Республикань Оцюнять пресс-службац