Отрослять основной показателензон колга азондсь РМ –нь здравоохранениянь Министрсь Олег Маркин. Сон китькстазе, што Россиянь здравоохранениянь Министрть Михаил Мурашконь шумбракстомасонза коллегиянь участникненди ульсть китькстаф: республикаса тиф покодемань системась макссь возможность касфтомс медицинскяй лездомать качестванц и доступностенц.
«Тинь покодеманттень смузец – тя ломанень ванфтомась, ломанень капиталть касфтомац, кода инь эрявикс странань и республикань богатства. Сянкса здравоохранениянь системать васенце задачац – демографическяй ситуациянь цебярьгофтомась и населениянь шумбрашинь показателень ванфтомась.
2023 кизоть итогонзон коряс средняй эряфонь показательть коряс -74 киза, мордовиясь занци омбоце вастть ПФО-са и 17 Россияса. 2030 кизоти регионти эряви сатомс целевой значения – почти 78 киза.
Республикаса лядонды стака ситуациясь шачемать коряс – мекольце веете кизотнень сон валгсь пцтай 26 %. Васенце причинась – фертильнай возрастса авань юмамась, 2019 кизоста сявомок синь эздост арась 11 тежяньтть малава сяда кржа. Тяка пингть ётафтови мерань комплекссь
Сянкса приоритетнай направлениятнень ёткса фкакс арась репродуктивнай шумбрашись. 2024 кизоня Мордовияса васенцеда кармай ётафтф населениять репродуктивнай шумбрашинц коряс диспансеризация – сон сувафты эсь эзонза 148 тежянь ломань.
Этай кизоть республикати удалась валхтомс куломань показательть и васенцеда мекольце колма кизотнень сатомс ковидта инголе уровентть. Именна 2019 кизоня сон ульсь инь ёмлась мекольце кемонь кизотнень.
Стабильнай эпидобстановкань ванфтомати республикаса особай внимания макссеви вакцинацияти.
Здравоохранениянь системать основац – васенце медико-санитарнай лезкссь. Мордовиясь ульсь китькстаф федеральнай уровеньца здравоохранениянь васенце звенать модернизациянь коряс программать цебярь вятеманц инкса. Мекольце вете кизотнень районнай больницятненди максф 429 оборудованиянь еденица, 36 машина врачень и фельдшеронь усксемс, 59 курокста лезксонь машина, касфтф 77 фельдшерско-акушерскяй пункт и колма врачень амбулаторият, ремонтировандаф 10 лама ФАП. Тяконь ётса лядонды эрявиксшись медучреждениянь ремонтса и строямаса и тя программать сяда тов поладоманц, и тяфтама решения Президентсь примась.
Ётай кизоть марнек кассань расходсь республикань здравоохранениять системанц лангс лиссь 9 млрд цалковайда лама, тя кизоть планца тняра жа. Льготнай лекарстватнень лангс максф 2 млрд. цалковайда лама – тя 414 тежянь рецептта лама. Республикань рукодствась примась решения максомс сахарнай диабедса сяряди шабатнень пчкафтоманонды финансирования. Тянь лангс республикань бюджетста кафта кизоста ульсь максф 94 млн. цалковайда лама – 308 иденди максфт глюкозань мельге ванома системат.
Нацпроектть «Здравоохранение» реализациянц пингста, вете кизоста эрь кодама финансированиянь источникста ульсь максф 14 млрд цалковайда лама: нолдафт тевс Республиканскяй онкологическяй диспансерть поликлиникань зданияц, Идень РКБ хирургическяй корпузсь, идень поликлиникась Рузаевкаса, сембонди рамаф 750 еденица оборудования. Покодемась нацпроектть коряс мольхтеви сяда тов.
Республикась медучреждениянь кадратнень коряс ПФО -са средняй показательда вяре – сяка пингть синь вастс путомасна аф пяк равномернай. Васенце задачась тя кизоти – первичнай медлездомань медорганизацияса кадровай дисбалансонь урядамась, сяда пяк республикать районцонза. Тяфта жа путф планц мерань целай комплесонь ётафтома, синь ётксост од специалистонь тердемась.
Особай покодема здравоохранениянь сфераса мольхтеви СВО-нь участникнень и синь семьяснон реабилитацияснон коряс. Мордовиянь медикне эрязста покодихть Херсонскяй областень Каланчакскяй областьса – тоза якасть уже кота бригадат. Ётафтф 24 тежяньть малама ванома и населениянь консультация.
Обязательнай медицинскяй страхованиянь Территориальнай фондтть покодемань итогонзон колга азондсь фондтть директороц Владимир Каргаев. Сердечно-сосудистай урматнень эзда куломань числань валхтома проектть покодеманц колга Мордовия Республикаса азондсь РКБ №1 главнай врачец Дмитрий Амелькин. Сон китькстазе: кда диспансернай учетсь кармай качественнай и сяда кели, сяльде и куломада нят урматнень эзда кармай сяда кржа. Эсьпингстонь урмань мумать важностенц китькстазе и РМ-нь
Минздравонь главнай внештатнай специалист-онкологсь Георгий Веснушкин. Ётай кизоть республикаса муф пяк лама злокачественнай новообразования. Цебярь, што 60 % синь ётксост – ранняй стадияса. Сяка пингть Мордовияса няеви онкологическяй урмань эзда куломань процентть валгомац. Ся корхтай сянь колга, что эсь пингонь обследованиясь, ранняй стадияса урмать мумац и лечиндамац кувалгафнесы и ванфнесы ломантть эряфонц. Ситуациять цебярьгофтозь аф кунара панчф онкологическяй лезксонь амбулаторнай центратне – синь эздост республикаса ниле.
Тяфта жа коллегиянь спикерхне азондсть организационнай решениятнень сувафтомаснон медико-санитарнай лездомань доступностть оцю ломанень населениять и республикань хирургическяй службать состояниянц колга.
Мордовия оцюнясь китькстазе: и медицинась, и сембе службатне, и регионтть Правительствац кармайхть покодема сянь лангс, штоба петемс демографическяй асушитне: «Конешна, тейнек эряви максомс сембе ули ресурснень шумбрашинь ванфтомати, сембода инголе, алянь и авань репродуктивнай шумбрашити».
Ульсь китькстаф, што первичнай звенань модернизациянь проектть коряс медико-санитарнай лезкстть качествац и доступностенц кассь. Но республикань эряйхнень эзда обращеният стаки сашендыхть.
«Минь ремонтировандаме мзярошка больниця и поликлиника, сразу няйсаськ ломаттнень настроенияснон. Тяниень пингть Российскяй Федерациянь Президентть Владимир Владимирович Путинонь лезксонц вельде нят кизефкснень лангса минь покодтяма. Эряви шарфтомс мяль передвижной медицинскяй комплексонь выездной медосмотрань ётафтоманди рамамать лангс. Минь задачаньке – обеспечендамс ломаттне цебярь диагностикаса и эсь пингстонь пчкафтомаса», - мярьгсь Артём Здунов.
Мордовииянь Оцюнясь азозе паллиотивнай лездомать качестванц касфтоманс эрявиксшинц, а станя жа СВО-нь участникнень реабилитацияснон – тя направлениясь должен улемс сембе медицинскяй учреждениятненди васенце вастса. Кафта кизоста федеральнай программать коряс республикав рамаф 460 оборудованиянь еденица 420 млн цалковай лангс, панчф колма реабилитациянь отделеният. Тя кизоть кармай рамаф нинге 100 оборудованиянь еденица 120 млн цалковай лангс. «Кулян цебярь валхт боецнень, синь семьяснон эзда, давайте кирьдсаськ тя уровентть. Мялезе азомс теентть оцю сюкпря тя земляконь категориять мархта покодеманкса», - китькстазе Артём Здунов.
Васенцекс задачатнень ёткс региональнай здравоохранениянь системаса маластонь перспективати Мордовиянь Оцюнясь путозень: Республиканскяй онкологическяй диспансерса реконструкциять ётафтоманц, веронь Службать модернизациянц, конац вятеви Россиянь Президентть лездоманц коряс, медицинскяй профилактическяй ваномань качествань и количествань максомать, отраслять цифровизациянц, Единай централизованнай информационнай системать лангс ётамать, федеральнай средствань мумань и сувафтомань коряс покодемать и цебярь кадраса системать пяшкодеманц.
Коллегиять покодеманц песа Артём Здунов казсь государственнай наградат и сюконясь Мордовиянь медикненди эсьпрянь аф ужяльдемань покодемаснон инкса: «Арьсян теентть шумбраши: тинь казенцасть сонь ломаттенди, Шкай ваноза, штоба сон улель и тинге!»
Мордовия Республикань Оцюнять пресс-службац