Мордовиянь Оцюнясь тяшкстазе, што ламоц кизотнень тяфтама историческяй памятникть строяманц коряс вешфкссь мольсь синцень республикань эряйхнень, рубежонь строительхнень атянь-атянь унокснон эзда.
«Тейнек пяк эряви ванфтомс историческяй мялямсь минь земляконьконь трудовой подвигснон колга Великай Отечественнай войнать пингста. Тя эряви сятненди, кие примась участия Сурскяй рубежть строямасонза, синь шабаснонды, унокснонды», - азозе Артём Здунов и сюконясь лезксонь максыхненди проектть эряфс нолдамста.
Мемориальнай комплексть кучкас сувасть Мордовияса шачихнень афкуксонь эряфсна, Сурскяй рубежть кеподиенза, - нят шабатне, сире ломаттне, священнослужительхне и аватне. Мемориалсь кармай ащема художественнай горельефста, памятникста и информационнай панельста, конат азондыхть тылонь труженикнень подвигснон колга 80-вайгяльбень кувалмоса оборонительнай рубежонь строямаса Сура ляйть маласа. Комплекссь кармай ащема Оцю Березникань паркса – эхянь содавикс туристненди вастса.
РВИО-ть Председателенц полафтыец Николай Овсиенко китькстазе, што проектсь нолдави эряфс «Культура» нацпроектть мяльса кирдезь. Сембе работатне арьсекшневихть шумордамс тядде.
«Сюконян Тейть, Артём Алексеевич, мес шарфнят оцю мяль тя проектть и Российскяй воеено-историческяй обществать региональнай отделениянц деятельностенц лангс. Тейнек тя пяк эряви!» - тяшкстазе Николай Овсиенко.
Тяшкстасаськ, што военно-историческяй обществань региональнай отделениясь Мордовияса покоди 10 кизода ламос – тя Россиять военно-историческяй наследиять ванфтоманц и популяризациянц коряс центра. Марса РВИО-ть мархта эрязста тиендевихть мялямонь вастт, тяфтапт кода Саранскяйса васенце масторлангонь войнань Геройхненди, Сире Шайгав велеса Советскяй Солдатти, Темникавса содаф адмиралти Фёдор Ушаковонди, Торбееваса Советскяй Союзонь Геройти Михаил Девятаевонди лемтьф памятникне. Башка ванф шарфтови од ломаттнень мархта патриотическяй работать вятеманцты. РВИО-ть кирдеманц лезксонц коряс эрь кодама кизоня Мордовиянь кадеттне и ушаковецне примасть участия военно-историческяй идень лагерень тематическяй сменаса, а 2022 кизоня Мордовиясь примсесь «Страна героев» лем ала военно-историческяй лагерень кизонь колма сменат.
Мордовия Республикань Оцюнять пресс-службац