Мордовияса Педагогонь и наставниконь кизоти итокт тифтольхть 21 декабрьста Саранскяйса «Высота» образованиянь од центраса. Торжественнай мероприятияса примась участия Мордовиянь Оцюнясь Артём Здунов.
Церемониянь участникнень приветствовандазень Россиянь просвещениянь министрсь Сергей Кравцов. Сон мярьгсь: Педагогонь и наставниконь основной задачац – китькстамс педагогонь профессиять престиженц. Кизоньберьф странать келес ётафтовсь пцтай 7 тёжятть мероприятия. Арьсефоль лама од традиция, фкясь синь ёткстост – «Сюкпря учительти» всероссийскяй акциясь.
Азфоль, што регионца оцю работа мольфтеви шабатнень и од ломаттнень асушиснон панчсемаснон коряс – республикась омбоцесь странаса тя направлениять коряс. «Коса ба ломанць афольхце няфте прянц, главнайсь – лядондомс ломанькс. Республикань школатне тя задачать пяшкотькшнесазь лац», - пшкядсь педагокненди и наставникненди Мордовиянь Оцюнясь.
Артём Здунов китькстазе: тя кизось ламода касфтозе од ломаттнень ёткса учительскяй профессиять престиженц - педагогическяй специальносттненди заявлениятнень лувкссна кассь 10 процентта.
Мордовияса фалу одкстопневи образовательнай организациятнень инфраструктурасна. Тядде федеральнай бюджетста водендаф 3,5 миллиард цалковай – школатнень капитальнайста петеманкса, од оборудованиянь рамаманкса. Панчф 159 Точка роста» центрат – школатнень 90 процентснон эса.
«Верондан, што экономикаса и промышленностьса сембе сатфксненди ушеткс путневи школатнень эса. Президентоньке аф кунар мярьгсь, што сембе войнатнень и оцю конфликттнень эса международнай уровеньца сяськондихть именна учительхне. Сюкпря теенть благороднай и аф простой трудонтень инкса!» - мярьгсь Артём Здунов.
Республикань Оцюнясь макссь государственнай казнет педагогическяй и воспитательнай работаса сатфксонкса.
Республикань учительхнень и наставникнень стане жа поздравляндазень Саранскяй и Мордовскяй митрополитсь Зиновий.
Мордовия Республикань Оцюнять пресс-служба