Региональнай таможненнай постонь од руководительсь шачсь Саранск Ошса, таможеннай оргаттнень эса служендай 1998 кизоста сявомок, ётазень сембе профессиональнай касомань аськолкснень инспекторста таможеннай контролень и таможеннай оформлениянь отделонь начальникти самс. 15 февральста сявомок Федеральнай таможеннай службань приказса Константин Поршин путф Саратовскяй таможнянь Мокшэрзянь таможеннай постти начальникокс.
Васьфтемаса корхтавсь регионть внешнеполитическяй касоманц-виияманц лангса покодемань кизефкснень колга. Тяниень пингть инь эрявикс направлениятне, кода китькстазе Мордовиянь Оцюнясь, - тя Саранскяень аэропортть международнай нолдамань пунктть панжемац и республикаса особай промышленно-производственнай типонь экономическяй зонань тиемась. «Особай экономическяй зонась – регионнти пяк эрявикс объект, тяфтама республикаса нинге ашель. Ламода сонь покодеманц мархта кармай сотф Мордовиять экономическяй касомац-вииямац», - мярьгсь Артём Здунов.
Тафта жа корхтавсь таможеннай операциянь сяда вишкста ётафтомань кизефкснень колга. 2023 кизоня республикань предприятиятненди мишенди партнеркс арась 60 лама страна, инь оцюфне ётксост Казахстанс и Беларуссь
Васьфтемаса примасть участия вице-премьерсь Батыр Эмеев и РМ мишендемань и предпринимательствань, экономикань Министрть и. о. Иван Горин.
Республика Мордовиянь Оцюнять пресс-службац