Участникнень видеосвязть вельде шумбракстозень сельскяй хозяйствань министрсь Андрей Разин и Мордовиять эзда Госдумань депутатсь, аграриянь кизефкснень коряс ГД-нь комитетонь председательть полафтыец Юлия Оглоблина. Андрей Разин китькстазе, што Мордовиясь маряй кенярдема эсь агропромышленнай комплексонц работанц инкса. «Площадь коре тинь региононте аф оцю, но тинь сувсетяда нармонень, тувонь, алонь производствань объёмса кемонь лидерхнень ёткс. Ня сатфксне кеняртьфтихть», - азозе сон.
Министрть полафтыец тяшкстазе Мордовиянь Оцюнять оржа ванфонц отраслять касфтоманц-виияфтоманц, сельскохозяйственнай кизефкснень ваномаснон лангс. Ётай кизоть республикаса сатф од рекорд сёронь касфтомаса и валовай тозеронь кочкамаса – тяляф кафта миллионда лама тонна. «Тинь ётасть цебярь показательхнень ётай кизоннетнень коряс, мезсь корхтай системнай покодемать колга», - китькстазе Анедрей Разин.
Койкс араф сельскяй хозяйствань направлениять башка Мордовиясь касфты-виияфты и отт – кепотьксонди, органическяй земледелиясь, сонь колганза республикань Оцюнясь азондсь странань Президентти Владимир Путинонди.
Ётай кизоть «Зрнянь сёксе» агропромышленнай выставкаса региононь стендсь арась фкя вастокс, коза сидеста сашендсть инжихть, республикась сатсь 31 казне, 25 ёткстост – инь оцюфне, стане жа сатсь Гран-при выставкать касфтомаса-виияфтомаса.
Министрть полафтыец пачфтсь Артём Здуновонди сюконямань валхт аграрнай ведомствань федеральнай руководительть Дмитрий Патрушевонь эзда, стане жа азсь сюконямань валхт Мордовиянь стендти «Россия» международнай выставкаса-форумса и кудонь жувататненди коське кормань нолямать коряс проектть эряфс нолдаманкса.
Госдумань депутатсь Юлия Оглоблина сюконясь мокшэрзянь аграрийхненди цебярь тевснон, од сатфксснон инкса, азондсь комитетть законотворческяй тевонц колга, кона шарфтф сельхозпроизводительхнень ширеснон кирдемаснон лангс.
Республикать агропромышленнай комплексть работанц итогонзон колга пачфтсь МР-нь сельскяй хозяйствань и продовольствиянь министрсь Антон Илюшкин. Сон тяшкстазе, што Мордовиять – цебярь экспортнай потенциалоц. «Республикась аф аньцек пяшкотькшнесы эсь потребительскяй спросонц палть, лофцть, алхнень и перень сёротнень коряс рынкаса, но и пачфнесы эсь продукциянц лия региоттненди и странатненди. 2023 кизоста АПК-нь продукциянь экспортть объёмоц савсь 63,5 млн. США-нь доллархт. Оцю ялганьке – тя Казахстанць и Беларуссь. Перспективнайкс ащи КНР-нь рынкась», - азозе Министрсь.
Чамзинскяй райононь КФХ-нь Оцюнясь Ирина Ямашкина азондсь модамарть касфтоманц коряс фермерскяй хозяйствать касоманц-виияфтоманц колга, лангти лихтезень прябалань кизефкснень, конань мархта сакшневи васьфнемс аграрийхненди. Артём Здунов мекпяли китькстазе: продовольственнай безопаснайшинь и сельскохозяйственнай производствать касоманц-виияманц колга тематне ащихть васенце вастса. Регионтть руководителец мярьгсь шарфтомда мяль ся направлениятнень лангс, конат тяниень пингть пяк эрявикст. Синь лувкссост – эпизоотическяй цебярьшись, сонь эряви ванфтомс, тянкса ётафтови куднармонень вакцинациять коряс работатне. Нинге фкя направлениясь – сельскохозяйственнай кооперациянь касфтомась-виияфтомась. Стане жа путови оптово-распределительнай центрань тиемать коряс задачась, кона кармай рамсемост лядыкс сельскохозяйственнай продукциятнень КФК-нь и ЛПХ-нь эзда. «Тя проектть эряви кирдемс, тонафнемс инструменттнень, конань вельде сон нолдави эряфс, - китькстазе Артём Здунов.
Пуромксть пингста максфтольхть государственнай и ведомственнай казнет. Казьфнень ётксот – Ковылкинскяй райононь КФК-нь Оцюнясь Алексей Кулагин, Теньгушевскяй райононь КФХ-нь оцюнясь Владимир Ащев, «Октябрьскяй» агрофирмань птицефабрикань операторсь Геннадий Чугунов, Елиниковскяй районцта машина вельде потямань операторсь Любовь Кнакнина, Кочкуровскяй районцта механизаторсь Николай Беззубов, Краснослободскяй районцта механизаторсь Виктор Дуркин, Рузаевскяй районцта вазонь андысь Татьяна Дивеева.
Мордовия Республикань Оцюнять пресс-службац