Национальнай театральнай школась 2022 кизоста сявомок ётафневи Россиянь Национальнай драматическяй театрать инициативанц коряс Культурнай инициативань Президентскяй фондть ширень кирдеманц вельде.
«Мялезе спасибамс республикань руководствати и лична Мордовиянь Оцюняти Артём Здуновонди культурнай сембе событиятнень лангс мялень шарфнеманкса. Тя сядонга лац няевсь тяни, мзярда ряцок Национальнай театральнай школать тренингонзон мархта тяса ётафтовихть российскяй масштабонь мероприятият. Тяконь лувксса, «Театральная осень» Россиянь национальнай театратнень фестивальсна, конань участниконзон еткса стане жа улихть Россиянь национальнай театратнень Ассоциацияснон членонза. А Махачкалинскяй Лакскяй музыкально-драматическяй и Адыгейскяй театратнень имена Саранскяйса минь примасаськ Ассоциацияти, кона тяни пуропни 42 национальнай коллектив странань эрь-кодама уженяста», - мярьгсь Александринскяй театрать директороц.
Сергей Емельянов лятфтазе, што «Национальная театральная школа» проектсь водендаф специалисттнень, конат заняфт вастова театральнай искусствать тиендеманц и инголи мольфтеманц мархта, профессиональнай уровеньцнон касфтоманцты.
Сонь эряфс ётафтомстонза ульсть образовательнай тренингт од менеджерхненди и театральнай руководительхненди, художественно-техническяй, постановочнай цехонь специалисттненди, актёрхненди и режиссёрхненди.
Тяда башка, тяни тя программатненди поладсть драматическяй лабораториятне. Синь участникснон работаснон результатснон няфтемс публикати арьсекшневи 2024 кизоня национальнай театратнень кизонь васенце всероссийскяй фестивальснон пингста, кона арьсеф 28 июненди – 3 июленди Владимирса и Суздальса. Тоса арьсекшневи ётафтомс Россиянь национальнай театратнень конгресснон.
Саранскяйса национальнай театратнень руководительсна полафтсть опытса.
Чеченскяй драматическяй театрать директороц Хава Ахмадова, кинь коллективоц аф васенцеда ни пачфнесыне Мордовияв эсь постановканзон, виденцясь: «Фалу пара мяльса сашендан Саранскяи, коса маштыхть эсь культураснон ванфтома и макссихть питне лия нароттнень искусстваснонды».
Россиянь Национальнай драматическяй театрать директороц Сергей Емельянов азозе, што ули мялец поладомс Мордовиять мархта сотрудничендамать. Кепотьксонди, маластонь пингть арьсекшневи ётафтомс Саранскяйса Александринскяй театрать шинзон.