3 апрельста «Правда и справедливость» аф зависимай региональнай и местнай СМИ-нь IV медиафорумснон пленарнай заседаниясонза Россиянь Президентсь Владимир Путин отвечась «Мордовия» ГТРК-нь журналистть Анастасия Видяевать кизефксонц лангс.
Кизефкссь сотфоль агропромышленнай комплексть санкциянь условиятнень и каршезост примаф мератнень пингста сяда товолдонь ширенц кирнеманц мархта.
«Мордовияса афкукс нефтась и газсь аф получсевихть промышленнай масштабса. Народнай хозяйствань, экономикань фкя инь эрявикс отраслясь – тя велень хозяйствась. И мекольдень пингть велень хозяйствась няфни пяк цебярь касома – 3 процентта лама. Аф лядонды шири и Мордовиясь. Афкукс пяк цебярьхть показательхне.
Тинь содасасть кодамольхть федеральнай ширень кирдемань цифратне меля. Тядде синь аф кирьфтавихть, синь аньцек касфневихть. И тя поладови сяда товга.
Мяльс сявондьса сянь, што санкциятне, конатнень колга корхтави, аф кармайхть фалу. А кда синь кармайхть улема фалу, минь перясаськ кить рынканьконди ся товархненди, конатнень анокламасна вийс коре эстееньковок. Минь вдь аф семботи перьсесаськ кить и аф сембе странатнень эзда. Тиендьсаськ тянь, азсаськ видеста, кочказь. Минь нолдаськ тевс ня санкциятнень, штоба тяка санкциятнень мархта тиемс каршек вачкодема и стане, штоба сон афоль канда вред, а аньцек лезнель.
Тя тейнек афкукс лезни, и минь сяда товга карматама работама тя принципть коряс – тиендемс сембот, мезсь канни тейнек польза и аф тиендемс сянь, мезсь шоряй тейнек касондомс-вииякшнемс.
Аграрийхнень минь сяда товга карматама кирнемонза ширеснон. Тейнек эряви шарфнемс мяль аф аньцек оцю производстватнень, но и фермерскяй хозяйстватнень, аф оцю предприятиятнень лангс. Мзярдовок аф юкснема, што странань 40 миллион гражданць эряйхть велеса. Оцю спасиба синь работаснон результатонзон инкса», - мярьгсь Россиянь Президентсь.
Мордовия Республикань Оцюнясь Владимир Волков: «Минь спасибатам аграриеньконь трудснонды оцю оценкань макссеманкса. Мелянь велень хозяйствань кизоть республикась афкукс аделазе аф кальдяв результат мархта. 7 процентта кассть объемтне аграрнай секторса. Получаф республикать историяста серонь инь оцю урожайсь, путф рекорд сахарнай якстеряпсть кочкаманц коряс, касфтф сиволень, алонь и лофцонь производствась.
Инголи тиендеви аськолкст приметневихть и тяддень кизоть ушетксста – кафта ковста нолдаф велень хозяйствань продукциять объемонза кассть 4,6 процентта. Минь педа-пес обеспечендакшнесаськ эсь пряньконь инь эрявикс ярхцамбяльхнень мархта, тяка пингть нолдаф продукциять 60 процентоц мишендеви шири.
Мекольдень кизотнень республикась сувси колма региоттнень-лидерхнень еткс, коса инь уцез продуктовай карзинась.
ВРП-са велень хозяйствать пяльксоц 2,5-крда сяда оцю средняйста странать эзга показательхнень коряс. Республикань эряйхнень 40 процентсна эряйхть велеса. Сяс минь активнайста работатама велень территориятнень виияфнемаснон коряс, федеральнай центрать ширень кирнеманц мархта лезнетяма аграрийхненди кредитса, техникаса, кемокснесаськ велеть инфраструктуранц – сембось сянкса, штоба ломаттнень улель возможностьсна эффективнайста трудендамс модать лангса. 2016 кизоня велень хозяйствань отрасляти максфоль пцтай 5 миллиартт цалковай государственнай лезкс, 2,4 миллиартт цалковайсь эздост – федеральнай бюджетонь средстват».