Россиянь спортонь министрть заместителец Павел Новиков: «Ся, мезе няень, кепси мяль и дивандафты!»

Россиянь спортонь министрть заместителец Павел Новиков: «Ся, мезе няень, кепси мяль и дивандафты!»

15 сентябрьста Саранскяи сашендсь Россиянь спортонь министрть заместителец Павел Новиков. Поездкать целец – максомс оценка 2018 кизонь футболть коряс миронь чемпионатти строяви объекттнень анокшиснонды. Марса Мордовиянь Правительствать Председателенц Владимир Сушковонь и «Казань» производственно-строительнай объединениять» генеральнай директоронц Равиль Зиганшинонь мархта сон ульсь чемпионатть главнай объектсонза – строяви «Мордовия Арена» стадионца.

Павел Новиков, Владимир Сушков и Равиль Зиганшин ванозь трибунатнень, корхтасть футбольнай паксять благоустройстванц колга, макссть оценка потмоширдень помещениятнень отделкаснонды.

Павел Новиковонь валонзон коряс, «ся, мезе сон няйсь, кепси мяль и дивандафты».

- Оцю прябалат стадионца аш. Тя удалаф зданиясь мазомкшни шиста-шис, - мярьгсь Россиянь спортонь министрть заместителец Павел Новиков.

Кода отмечазе Правительствать Председателец Владимир Сушков, федеральнай министерствань представительть оцю оценкац пяк питни республикати.

- Павел Владимирович ашель ширесонк пцтай киза и няезень тяса аф емла полафткснень. Мекольдень шитнень стройкась получазе омбоце ваймоть. Ламода касфтовсь рабочайхнень лувкссна. Тячи эздост пцтай 2000 ломань. Мордовиянь Оцюнять аф оцю пингс тевонзон тиендиснон Владимир Дмитриевич Волковонь мархта путф задача – мзярс кирди цебярь погода, аделамс работатнень благоустройствать коряс, - китькстазе Владимир Сушков.

Павел Новиков шарфтсь мяль чемпионатть наследиянц лангс. Сон, кле, ламода лезды республикаса физическяй культурать и спортть виияфнемаса.

- Ванондови кизефкссь Мордовияса футболть коряс академиянь пуроптомать коряс, коса шабатне кармайхть тонафневома футбольнай мастерствати. А «Мордовия» футбольнай клубсь кармай стадиононь инь главнай азоркс. Надиятама, што «Мордовия Аренать» маласа эвондай пяк цебярь спортивнай инфраструктура, - китькстазе Павел Новиков.

Чемпионатта меле федеральнай центрась арьсекшни паннемс региоттненди субсидият объекттнень- мундиальть наследиянц тевс нолнеманкса.

Шить омбоце пялестонза Павел Новиков и Владимир Сушков ванозь Саранскяйса аэропортовай комплексть строяманц.