Российскяй наукань шиста Мордовиянь Оцюнясь Владимир Волков примась участия «Молодежный» инновационнай бизнес-инкубаторть панжемаса, кона арай Мордовия Республикань IТ-отраслянь инновациянь виияфнемань центракс. Од объектсь строяф ушеткшни предпринимательхнень ширеснон кирнеманкса. Тяса теест ули кода получамс арендас помещеният, конат козякофтфт эрявикс IТ-оборудованияса, программнай обеспеченияса, мебельса и оргтехникаса, а стане жа тяса ули кода получамс бизнесть вятемста эрявикс услугатнень – консультационнайхнень, бухгалтерскяйхнень и юридическяйхнень.
Владимир Волков интерес мархта ванозень бизнес-инкубаторть функциональнай зонанзон, конат занцихть 2,5 тежянь квадратнай метрань площадь. Васенце этажса – проектонди коворкингсь (коворкинг – мялень-арьсемань площадка, кона водендаф од исследовательхнень бизнес-идеяснон виияфнеманкса), тяса жа – сервиснай компаниятнень, бизнес-инкубаторонь управляющай компаниять офиссна, учсемань комфортабельнай зонась и 44 вастонди столовайсь. Коворкинг-зонаса республикань Оцюнясь, корхнемок од предпринимательхнень мархта, отмечазе инновационнай кадрань касфнемань лама уровеньца системать эрявиксшинц: «Идень Технопарксь», «Молодежный» бизнес-инкубаторсь», «Мордовиянь Технопарксь», проектса «IТ-парксь» - сембось тя ключ IТ-технологиянь сфераса работаманди од ломаттнень кошардомаснон коряс прябалать решандаманцты. Тейнек эряви козякофтомс республикань рынкать IТ-технологиянь оцю уровенень специалистса, машфтомс кадровай вачашить, кона тя сфераса мзярс нинге ули».
Омбоце этажса Владимир Волков ванозе коворкингонь нинге фкя зонать (сембоц эздост бизнес-инкубаторса – 127 оборудованнай рабочай вастонди), переговорнай комнататнень, 49 вастонди конференц-залть. Бизнес-инкубаторонь резиденттне няфтезь республикань Оцюняти эсь инновационнай проектснон, тяка лувкссот: беспилотникнень тевс нолнезь точнай земледелиянь программно-аппаратнай комплекссь, авиационнай электроникань САПР-сь, светодиоднай прожекторнай лампань анокламать коряс проектсь , кона нолневи тевс машина кинь транспортса. Владимир Волков макссь цебярь оценка мокшэрзянь иноваторхненди, тяка пингть отмечазе, што проекттнень разработкасна мольфтема фкя пингста практическяй испытаниятнень мархта, синь эряфс етафнемаснонды эряви поладомс и предприятиянь вятихненди.
Журналисттнень мархта корхнемста Владимир Волков отмечазе: «Молодежный» бизнес-инкубаторсь должен лездомс рабочай васттнень ванфтомаснонды, конатнень панжезь IТ-отраслянь малай предприятиятне, и панжемс отт. Пяк внимательнайста малаткшнема инновационнай проекттнень анокламаснонды. Минь путнетяма задача, штоба мяльхне-арьсематне сяда курокста шарондольхть практическяй бизнес-проектонди, конатненди ули вешфкс аф аньцек республикаса, но и целайнек Россияса и омба масторса».
«Молодежный бизнес-инкубаторсь панчф Псковскяй ульцяса ингольдень идень больницять зданияса, коса тифоль реконструкция. Сонь строяманкса федеральнай бюджетста нолдафоль 94,5 миллион цалковай, 14 миллион цалковайсь – Мордовия Республикать казнаста. Нинге фкя корпусть арьсекшневи реконструировандамс IТ-паркть алу, казанскяйть примеронц коряс, нолнемок тевс инвесторхнень средстваснон. Владимир Волков мярьгсь кярьмодемс тя проекттть эряфс етафнеманцты одути аф кадондозь.
Мордовия Республикань Оцюнять Пресс-службац