18 мартста Саранскяйса ульсь «Минь – марсотама!» митинг-концерт, кона лемтьфоль Крымть и Севастополь ошть Россиять составс сувамстост колма кизонь топодемати.
Тя ульсь афкуксонь народнай праздник, конань эса примась участия 10 тежятть ломанць. Ледовай дворецть инголе пуромкшнесть трудовой коллективонь, общественнай движениянь и партиянь, национальнай диаспорань представительхне, ветераттне, студенттне, республиикань инь цебярь творческяй коллектифне.
Митингса примасть участия МР-нь Государственнай Собраниять Председателец В.В.Чибиркин, Саранск ошень округонь оцюнясь П.Н.Тултаев, МР-нь Оцюнять Администрациянц сотрудниконза, Мордовиянь Правительствать членонза.
Илать сьмекаенза-пуроптыенза – республикань общественнай организациятне. И сценать лангста, и площадьса тага и тага кайгсть странань Президентть В.В.Путинонь историческяй валонза, конатнень сон азозень колма кизода инголе: «Стака, муцяй уендемада меле Крымсь и Севастопольсь мрдасть родной гаванти, сембе пингонь пропискань портти – Россияв».
Тяса-тоса няевсть общественнай движениянь активисттнень лозунгснон мархта плакаттне: «Спасиба Крымонь и Севастополень эряйхненди синь последовательнай позицияснон инкса. Минь сяськсаськ сембе сталмотнень, сяс мес минь марсотама!»
«Единай Россиянь од гвардиянь» республиканскяй штабть вятиец Е.Миронов, митингонь пуроптыхнень еткста фкясь, корхтась сянь колга, што Мордовиясь кирдезе Крымонь народть решениянц ширенц. Полуостровти прважсевсь гуманитарнай лезкс, тоса работасть педагогическяй отряттне, ваймосесть Мордовиянь шабатне. Сембода активнай общественникне примсесть участия «Таврида» од ломанень форумть работаса. МР-нь Оцюнять В.Д.Волковонь мяленц коряс Крыму прважафт Мордовиять колга книгат, меле тоса пуроптови библиотека, кона кармай пачфнема странань сембе региоттнень колга.
Е,Сыщикова, Мордовиянь Госсобраниянь депутатсь, родительскяй ассоциациять пуроптыец, лемдезе Крымть – лама идень российскяй оцю семьянь членкс, коса сембось кирди фкя-фкянди лезномать и ладямать лангса. Тядде ни родительскяй сообществань активисттне арьсихть панжемс Крымса идень образовательнай центрат.
«Дом дружбы народов» республиканскяй общественнай культурно-просветительскяй организациять вятиец Р.Акашкина лятфтазе, конашкава кемот Мордовиять и Крымть духовнай соткссна, и васендакиге минь маласькофнесамазь героическяй етай пингоньке, кона сотф великай флотоводецть Ушаковонь лемонц мархта. Тяниень пингть Крымса эряй 20 тежянь мокшэрзя, тоса работай Ушаковонь лемса Мордовиянь нароттнень марс пуропнемань мордовскяй культурнай центрась, ладяфт соткст Крым Республикань Народонь дружбань кудть мархта.
Нинге ламос ашесть тушенда ошэряйхне площадть лангста. Саранскяйть вельхксса кайгсь музыкась, вармась люкафнезень флакнень.