25 ноябрьста Национальнай драматическяй театраса казьфтольхть «Православный учитель 2016» Приволжскяй Федеральнай округонь II конкурсонь сяськихне и лауреаттне. Пуромксса участия примасть ПФО-са РФ-нь Президентть полномочнай представителенц заместителец Олег Мельниченко, Мордовиянь Оцюнясь Владимир Волков, Саранскяй и Мордовскяй митрополитсь Зиновий и лият.
Олег Мельниченконь валонзон коряс, «Православный учитель» конкурссь ламода лезни учительхненди, конат вятьсазь «Основы православной культуры» дисциплинать, касфнесы синь профессионализмаснон.
«Конкурсть итогонзон коряс тиевихть методическяй наработкат, конат меле прважавихть школатненди. И тя пяк эрявикс», - азозе Олег Мельниченко.
Эсь выступлениясонза Владимир Волков азсь благодарностень валхт ПФО-са РФ-нь Президентть полномочнай представителенцты Михаил Бабиченди и сонь заместителенцты Олег Мельниченконди сяс, мес Мордовияти тага максфоль правась пуроптомс эсь ширесонза инь цебярь православнай учительхнень, конат вятьсазь «Основы православной культуры» курсть.
«Минь шарьхкотькшнесаськ тянь кода од ломаттнень патриотическяй воспитанияснонды, православнай верать кемокснеманцты Мордовиять оцю путксонц отмечаманц, - мярьгсь Мордовиянь Оцюнясь.- Лама кизонь квалмоса Мордовиясь лувондови регионкс, коса властень оргаттнень, духовенствать и общественностть марстонь вийсна шарфтфт духовно-нравственнай питнешитень эреклафтомаснонды и виияфнемаснонды».
Республикань Оцюнясь отмечазе, што мекольдень комсь кизоста Мордовияса строяф 400-ть малава православнай храм, «эреклафтф» сядот приход, Церькавти мрдафневихть сонь тяда ингольдень зданиянза.
Сембе ня сатфксненди аф весть макссесть оцю оценка Русскяй православнай церькавонь иерархне.
«Ушедомок юбилейнай 2000 кизоть эзда и тяниень пингти молемс сембе Русень Патриархсь ветексть сашендсь республиказонк. И эрь самац арсесь историческяйкс, макссесь вийхть и кемама, водендакшнемазь созидательнай тевонь тиема. Тяфта, 2006 кизоня Патриархсь Алексий святиндазе святой праведнай воинть Феодор Ушаковонь Кафедральнай Соборонц. Мелянь октябрьста Москувонь и сембе Русень Святейшай Патриархсь Кирилл етафтсь святиндамань чин святойхнень равноапостольнайхнень Кириллонь и Мефодиень храмса», - азозе В.Д.Волков.
Республикасонк торжественнайста отмечафтольхть Русть крестиндамста 1025 кизонь топодемась, Мокшэрзянь народть Российскяй государствань нароттнень мархта ладязь эрямаста тежянь кизонь топодемась, Феодор Ушаковонь 270 кизонь топодемац и Сергий Радонежскяень 700 кизонь топодемац и ламотне лиятне.
Мордовиянь Оцюнясь лятфтазень странань Президентть В.В.Путинонь валонзон сянь коряс, што обществать консолидациянкса эрявикст духовнай, традиционнай нравственнай питнешитне.
«И тяса башка васта макссеви образованияти. Сяс тячи минь идень садоньконь, школаньконь, колледженьконь, техникумоньконь и вузоньконь эса шабатне и од ломаттне аф аньцек содамошит получсихть, но и содафнихть духовность, культурать мархта», - поладозе Владимир Волков.
Сон китькстазе, што Мордовияса пуроптф оцю опыт тянь коряс образованиянь сембе уроветтнень эса, дошкольнайть эзда сявомок профессиональнайти молемс. Ушедомок идень саттнень эзда, келиста нолневихть тевс духовно-нравственнай воспитаниять коряс авторскяй программатне. Республикаса «Основы православной культуры» предметсь тонафневи ламоц школатнень эса.
«Высшай учебнай заведениянь преподавательхнень мархта аноклафт «Основы православной культуры» и «Основы исламской культуры» эсь лацонь учебнай пособият. Кизоста кизос республикань райоттнень эса касонды кадетскяй и казачай класснень лувкссна. Тяни 133 тяфтама школатнень эса тонафнихть колма тежятть вете сядот школьник. Тяса тонафнемань процессь вятеви российскяй инь цебярь гражданскяй, патриотическяй и духовно-нравственнай воспитаниять мяльс сявондезь. Лезкс теест макссихть МЧС-нь, МВД-нь, ДОСААФ-нь специалисттне, армиянь и флотонь ветераттне, казачествань представительхне», - отмечазе МР-нь Оцюнясь.
Владыкась Зиновий китькстазе, што тячи кода аш мзярдовок васта мушенды шабатнень и од ломаттнень патриотическяй и духовно-нравственнай воспитаниясна. Учительхнень лангс путневи башка миссия касфтомс од поколениять грамотнайкс, образованнайкс, сембе ширде енюкс, а стане жа виияфнемс эсост духовно-нравственнай качестватнень, патриотизмать.
«Аш месть корхтамс, ломанть касфтомаса ламось ащи родительхнень эзда, но аф емла путкссна тянди и учительхнень», - мярьгсь Саранскяй и Мордовскяй Митрополитсь Зиновий.
Азсаськ, што конкурсонь сяськикс арасть ПФО-нь 36 педагогсь, колмотне конатнень эзда Мордовияннет.