8 апрельста Мордовиять столицаса «Навеки с Россией» памятникть малас пуромкшнесь 14 тежяньда лама ломань, штоба кирдемс Санкт-Петербургса террористическяй актть пингста ранендафнень ширеснон, лятфтамс шавфнень. Тясольхть общественнай организациянь, политическяй партиянь, трудовой коллективонь представительхне. Акцияса примась участия Мордовиянь Оцюнясь Владимир Волков. Акциясь ушедсь минута кашт аф молезь ащемаста.
Ветераттнень представительсна отмечазе, што Петербургть тячи сатозе стака пинге.
«Питербургсь кирдсь лама нужа ленинградскяй блогадать пингста. Но стакатне-сталмотне ашезь синде ломаттнень, синь сяськсть. Ашесть синдев ошэряйхне фашисттненди, аф удалай тиемс тянь и террористтненди», - мярьгсь ветеранць.
«Электровыпрямитель» АО-нь рабочайсь Алексей Кузнецов отмечазе, што трагедиясь Санкт-Петербургса киньге аф кадондсы озадонь седихть ащема. «Минь заводонь рабочайхне кирдьсаськ ошэряйхнень ширеснон, ризнатама шавфнень радня и мала ломаньцнон мархта. Кеняртькшнетяма шиса лятфнень инкса. Минь мяляфтьсаськ, што заводоньконь родинац – Ленинградсь. Террористтне тя сяземать мархта тяряфтсть эвфтемс минь. Но теест тя ашезь удала», - мярьгсь рабочайсь.
Акциять пингста кулхцонтфоль Саранскяень церать Дмитрий Глазковонь аудиообращенияц. Церась сязевомать пингста стане жа ульсь питерскяй метроса, ранендафоль, а республикань эряйхне лездсть теенза мезьса маштсть. Церась азсь тянкса сембонди оцю спасиба.
ЛДПР, «Справедливая Россия», «Единая Россия» политическяй партиянь представительхне отмечазь, што террористтне тяряфтсть эвфтемс ломаттнень, а тейнек тячи эряви пуромомс марс каршезост ащемаса. Партиецне тердсть кирдемс Санкт-Петербургонь эряйхнень ширеснон. Странань эрь ломанць должен шарьхкодемс эсь ответственностенц странать сай пингонц инкса.
Киргизияста студентсь, кона тонафни Мордовскяй госуниверситетса, азозе, што республикань вузонь сембе омба масторонь студенттне ризнайхть марса Россиять мархта.
Н.П.Огаревонь лемса МГУ-нь студенткась Инна Горошкова сась Саранскяи тонафнема Санкт-Петербургста. Сязевомать пингста шавовст стирть мала ломаненза, содафонза. Студенткась тердезень сембонь марса тюремс терроризмать каршес.
Меколи акциянь участникне нолдасть менельти акша шархт террористическяй акттнень пингста шавфнень лятфнеманкса.