Путепроводть ниле китьксса проезжай пяльксоц, кафтонь эрь направлениять эса, а стане жа перяфкс мархта тротуархт. Ремонтть строительхне шумордазь пингта инголе. Благоустройствань сембе тефне аделавихть кизоть пенцты.
Капремонтть тиемста тевс нолдафтольхть тяниень пингонь технологиятне и материалхне — ладяфт композитнай материалста перильнай перяфкст, барьернай перяфкст и оцинкованнай стальста контактнай сетень опорат, светодиоднай светильникт. Саранскяйть центральнай пяльксонц эзда промышленнай зонав движениять обеспечендазь седсь кирьфнесы пачкодемань пингть.
Артём Здунов шарфтсь мяль, што седть петемац пяк эрявсь, вдь сон ашезь тиендев 50-да лама киза. Средстватне нолдафтольхть республикань Дорожнай фондста, кона мекольдень кизотнень касфтовсь кафтонь-крда, тяконь лувксса федеральнай центрать ширень кирдеманц вельде.
Мордовиянь Оцюнясь спасибась строительхненди работаманкса, проектировщикненди, отмечамок, што пяк важна, мес седсь петевсь тялоть самс. Артём Здунов китькстазе, што республикаса сеттнень петемасна и одкстоптомасна мольфтеви сяда тов — сятнень, конат ащихть аварийнай и предаварийнай состояниясот.
Саранск ошень округонь оцюнясь Игорь Асабинонь валонзон коряс, общественнай транспортсь од седть эзга нолдави ёткшиста, 11 ноябрьста. Корхтамась мольфтеви 7№, 15№, 17№, 31№ и 44№ автобуснень колга. Троллейбуснень вастс тя маршрутса мзярс кармайхть автобуст.
Эряви азомс, мекольдень кизотнень сембе вийса стройсевихть и одкстопневихть республикань эряйхненди важнай путепровоттне. Меля капитальнайста петьфоль Мордовиять столицанц центральнай путепроводоц — Бетевградскяй ульцять эзга седсь. Сон строяфоль 1981 кизоня, и капитальнайста петьфоль васенцеда. Российскяй Федерациянь Правительствать резервнай фондстонза средстватнень вельде строяф севернай промзонаса кись, «Севернай тупиксь» арась «Севернай проездонди», тянь эса ошеряйхне учендсть лама киза.
Тядденди платтне аф сяда ёмлат. Поладови Рузаевка ошть шарксонц, Строительнай ульцять эзга Победань ульцяста сявомок Гожувскяй ульцяти молемс машина кить и Инсара ляйть туркс путепровод мархта автомобильнай кить строямасна.
Мордовия Республикань Оцюнять пресс-службац