Саранскяйса официальнайста панчфоль аэропортсь

Саранскяйса официальнайста панчфоль аэропортсь

12 майста Саранскяйса официальнайста панчфоль аэропортсь. Торжественнай мероприятияса примасть участия Россиянь транспортонь министрть тевонзон тиендисна Максим Соколов и Мордовия Республикань Оцюнясь Владимир Волков.

Лятфтасаськ, аэропортовай комплексть модернизациянц пингста строяфт кафта терминалхт – внутренняй и международнай воздушнай линиятненди, етафтфт работат взлетно-посадочнай полосать реконструкциянц, рулежнай од кинятнень строямаснон, перронть келептеманц коряс. Тяни Саранскяень аэропортти ули кода примсемс оцю воздушнай суднатка.

Минтрансть вятиец шарфтсь мяль сянди, што тяниень пингонь од аэропортть оцю значенияц республикать сяда товолдонь касондоманкса-вииякшнеманкса, тяконь лувксса регионть лангс инвестиционнай и туристическяй мялень шарфнемать касфнеманкса. Стане жа Максим Соколов азсь благодарностень валхт Мордовиянь Оцюняти тя пяк эрявикс проектть эряфс ётафтоманкса.

Максим Соколов лятфтазе, што Саранскяень аэропортсь ушедсь примсема рейснень нинге февральста, и республикань ламоц эряйхненди и ошень инжихненди удалась ни содафтомс од объектть мархта.

«Сембе од инфраструктурась строяфоль Миронь чемпионатти анокламань программать коряс, и сон кемотть киза кармай служама республикать сяда товолдонь вииякшнеманкса,—мярьгсь Минтрансонь оцюнясь.—Аф тёждяль мумс финансирования, кода региональнай, стане и федеральнай, ульсть кой-кодама сталмот. Но работамок командаса, странань Президентть и Правительствать ширень кирдемаснон вельде, минь муме эрявикс средстват, и тя объектсь мировой футбольнай первенствать ушедомда ламода сяда инголе сувафтфоль тевс. Тячи Мордовиять транспортнай инфраструктурац педа-пес анок Миронь чемпионатти».

Мордовиянь Оцюнясь Владимир Волков поздравляндазень республикань эряйхнень тя оцю событиять мархта. «Аэропортсь—тя чемпионатонь наследиять фкя инь васенце объектоц, кона кармай работама ломаттненди лама-лама киза. Проектсь ётафтфоль эряфс странань Президентть и Правительствать, Минтрансть и лична Максим Юрьевич Соколовонь, а стане жа полномочнай представительть Михаил Викторович Бабичень ширень кирдемаснон вельде. Минь аэропортоньке отвечай тяниень пингонь сембе вешфксненди, тяконь лувксса и безопасностть коряс. И республикати пяк важна, штоба чемпионатта меле сон ванфтольхце международнаень статусонц», - китькстазе Мордовиянь Оцюнясь.

Максим Соколов азозе, што сай недялять тя кизефксть коряс ушеды работама межведомственнай комиссиясь. Сон кармай вешендема решеният, конат лездыхть кадомс Саранскяйти международнай терминалть.

Мордовия Республикань Оцюнять пресс-службац