9 майста Саранскяйса, кода и марнек странаса, келиста отмечафоль Победань шись. Тядде топодсь 73 киза, кода народоньке сяськсь 1941-1945 кизонь Великай Отечественнай войнаса.
Победань площадьса митингс-реквиемс пуромкшнесь 15 тежяньда лама ломань. Вечнай толть ваксса, койс коре, почетнай вастснон занязь войнань и трудонь ветераттне. Лемозост лямбе валхт азсь Мордовия Республикань Оцюнясь В.Д.Волков. Оцю инжихнень еткса стане жа ульсть МР-нь Госсобраниять Председателец В.В.Чибиркин, республиканскяй Правительствать Председателец В.Ф.Сушков, МР-ть эзга главнай федеральнай инспекторсь М.С.Сезганов, МР-нь Оцюнять Администрациянц вятиец А.А.Богатов,Саранск ошень округонь оцюнясь П.Н.Тултаев, Саранск ошень округонь депутатонь Советть председателец Н.Ф.Бурнайкин, Великай Отечественнай войнань участниксь Александр Иванович Марков,Саранскяй и Мордовскяй митрополитсь Зиновий и лият.
—Победань шись—тя инь васенце праздниксь марнек странаньконди!—ушедозе эсь корхтаманц В.Д.Волков.—Тя минь историяньке, марстонь гордостеньке! Тячи минь тага весть сюконятама ветераттненди, кит эсь прянь аф ужяльдезь ащесть Родинать инкса тюремань паксяса, кит маласькофнезь Сяськомать тылса.
Победань Знамясь. Георгиевскяй лентась. Фронтовой моротне и боевой историятне. Атяньконь орденцна и медальсна, сермасна и фотографиясна. Тя сембодонга святойсь, мезе минь ули!
Республикань Оцюнясь лятфтазе, што Мордовияста фашисттнень каршес тюрема сявфоль 246 тежянь ломань, эрь омбоцесь эздост ашезь мрда куду… Кода отмечазе В.Д.Волков, республикань солдаттне афкуксонь геройкс ащесть шачема масторть инкса сембе фронттнень эса. Етксост полководецт и
рядовойхть, аф фкя национальностень ломатть. Синь максозь Сяськомать инкса семботь, мезе маштсть, кулсесть и сяськондсть, штоба эряль Родинась, эрялеме минь, штоба минь мяляфтолеськ…
Стака шарьхкотькшнемс, но кизоста кизос Победань шить мархтонк васьфнесы коль сяда кржа фронтовик. Пингть аф лоткафтсак, но синь, сембе пингонь геройхне, фалу мархтонокт! – поладозе корхтаманц сяда тов В.Д.Волков.
- Эряви мяляфтомс, юкстасаськ – аф ульхтяма минь! Башка тя важна тяниень пингть, мзярда «аф ялганьке» старандайхть полафтомс историять, люпштамс Россиять, тяряфнихть срхкафнемс военнай конфликтт.Сяс пяк важна молемс фкя стройса, марстонь «Бессмертнай полкса», макссемс марстонь Победаньконь колга «видешинь эстафетать»!
Тячи тясот, Победань Площадьсот, минь од ломаненьке, юнармеецне, кадеттне и казакне, Отечествань сай пингонь аралайхне. Именна теенть, кельгома од ломатть, сави ванфнемс Великай Отеччественнаень солдаттнень подвигснон колга мялямть. Сятнень колга, кинь удалась теенть няемс, кие сельмоста сельмос азондсь теенть ся войнать колга, кинь кирдесть кядьта.
Россиянь Президентть В.В.Путинонь руководстванц ала, сельминголенк, пуропневи странать сай пингонь историяц – сонь эрекламань, од виень и авторитетонь пуропнемань историяц. И ковда меле ни Мордовиясь арай пяк оцю спортивнай илань – футболть коряс миронь чемпионатонь центракс.
Петр Тултаев отмечазе, што Великай Победань шись – всенароднай праздник, кона сембе пингс ляды оцюдонга оцю героическяй событиякс, национальнай гордостеньконь символкс.
«9 майсь – тя афкукс святой праздник марнек странати, ошеньконди и эрь семьяти. Победань шись – тя мялямсь, конань кородозь ванфнесы эрь российскяй семьясь, тя ся, мезсь маласькофнесамазь минь и тиендьсамазь аф сяськовикс», - поладозе саранск ошень округонь оцюнясь.
Ветераттнень лемста пуромфнень инголе корхтась Великай Отечественнай войнань ветеранць А.И.Маркин. Сон лятфтась ся оцю питнеть колга, конань савсь максомс Сяськомать инкса. Стане жа ветеранць азсь благодарностень валхт республикань руководствати ветераттнень и сембе эряфкшу ломаттнень ширеснон кирнеманкса.
Мордовиянь од ломаттнень эзда ветераттнень инголе корхтась 24№ школань тонафнись Кирилл Хоркин. Сон лятфтась эсь атянц колга, кона ашезь мрда фронтста, и спасибась сембе ветераттненди сетьме эряфонкса.
Воиттнень-землякнень памятникснонды путфтольхть венокт Мордовиянь Оцюнять, республикань Госсобраниять и Правительствать, ПФО-са РФ-нь Президентть полномочнай представителенц Аппаратонц, Саранск ошень округонь оцюнять и депутатонь советть эзда. Стане жа путфтольхть панчфт Мордовиянь почетнай граждаттнень, трудовой коллектифнень, образованиянь, здравоохранениянь, спортонь, общественнай организациянь представительхнень эзда.
Великай Отечественнай войнаса шавфне лятфтафтольхть минута кашт аф молезь ащезь, мезьда меле менельти нолдафтольхть акша гуленятне и воздушнай шархне.
Митингта меле Саранскяйса етась Победать лемс парадсь, а меле торжественнай шествиясь, коса примасть участия 25 тежянь ломань, срхкась мемориальнай калма лангс. Шествиять вятезь «УАЗ-не», коса озсефтольхть ветераттне. А 15 частса Саранскяйть эзга етась «Бессмертнай полксь».