Сексень пяльксть панжезь Н.П.Огарёвонь лемса МГУ-нь, М.Е.Евсевьевонь лемса МГПУ-нь (Саранскяйсь), Ф.Э.Дзержинскяень лемса ДНР-нь Внутренняй тевонь министерствань Академиянь (Донецкяйсь) и Б.Б.Городовиковонь лемса Калмыцкяй государственнай университетонь сборнайхне.
Эряви азомс, што васенце матчть пингста Саранскяень аренаса одкстоптфтольхть НСФЛ-нь тяниень сезононь кафта рекорттне. М.Е.Евсевьевонь лемса МГПУ-нь сборнайсь примазень Б.Б.Городовиковонь Калмыцкяй государственнай университетста соперниконзон и сяськозень элистинецнень 9:0 счётса.
«Б» таблицать эса инь вярьце строчкаса ащи 27 очка мархта Н.П.Огарёвонь лемса Мордовскяй государственнай университетонь командась. 8 сентябрьста Саранскяйста командась примазень Ф.Э.Дзержинскяень лемса Донецкяй народнай республикань Внутренняй тевонь министерствань Академияста оппоненттнень, васедемась шумордавсь 1:1 счётса.
Ёткшиста «Мордовия Аренаса» пялькстсть Н.П.Огарёвонь лемса МГУ-сь и Калмыцкяй госуниверситетсь. «Огарёвецне» сяськсть 8:1 счётса. Трибунатнень эса ваныхнень ёткса ульсть Мордовиянь Оцюнясь Артём Здунов и РФ-нь юстициянь министрть заместителец, Национальнай студенческяй футбольнай лигать Попечительскяй советонц председателец Алу Алханов, кона отмечазе Саранскяйса пяк цебярь футбольнай инфраструктурать.
Журналисттнень мархта корхнемста Алу Дадашевич азозе, што Россиянь высшай образованиянь тонафнемань организациятнень командаснон межрегиональнай турнирснон ётафтоманц колга договорённосттне сатфтольхть Мордовиянь Оцюнять Артём Здуновонь мархта тяда ингольдень васедематнень пингста: «Оцю спасиба республикань руководствати тя возможностть инкса ётафтомс очередной тернироньконь стадионца, коса ётафтфтольхть футболть коряс миронь чемпионатонь матчне! Саранскяйсь — футбольнай ош, тяса лама студентта, тяконь лувксса омба мастороннеда. Кеман, што тя цебярь койсь поладови сяда тов», - мярьгсь Алу Алханов.
Национальнай студенческяй футбольнай лигань Высшай дивизионть мяльса кирдезь комплекснай всероссийскяй пялькстоматне ётафтовихть «Спорт — норма жизни» федеральнай проектть эряфс ётафтоманц рамкаса Россиянь Спортонь министерствать, а стане жа РФ-нь Наукань и высшай образованиянь министерствать и Российскяй студенческяй спортивнай союзть ширень кирдемаснон пингста.
НСФЛ-нь сембе матчнень ули кода ваномс прямой эфирса «Наш спорт» ссылкас коре.
Мордовия Республикань Оцюнять пресс-службац