21 апрельста Саранскяйса панжевсь «Мордовия Арена» од стадионць.
Од стадионць панжевсь тестовай матчть мархта, коса васедсть «Мордовия» и «Зенит-Ижевск» командатне. Налхкомать ванома пуромкшнесь 13 тежяньда лама ломань. Етксост ульсь аф кржа оцю инжи: Россиянь Правительствать Председателенц заместителец Виталий Мутко и Мордовиянь Оцюнясь Владимир Волков. Сембонь мяльсноль содамс аф сяшкава матчть результатонц, а сянь, анок-аф Саранскяйсь оцю футболти.
«Мордовия Аренась» экзаменть максозе. Аф простой задачат путнесь од стадионть инголе погодась. Шобдавань шинять полафтозь шобда туцятне и вармась, меле ушедсь поксордама пиземня. МЧС-ссь пачфтсь вии вармать малаткшнеманц колга. Аф ваномок тянь лангс, стадионть потмоса ульсь пара, Стадионть конструкциянза кирдсть вармать и пиземть каршес.
Лац кирдезень испытаниятнень и стадионть инфраструктурац. Тестовай матчть пингста панчфтольхть стадионц нилецьке суваматне, а сяс ломаттне ашесть пуромкшне кувака очередьс. Эряви азомс, башка оцю мяль шарфтфоль безопасностень кизефксненди. Пропусконь пункттнень и досмотровай зонатнень эса полицейскяйхне лац-ряц ванондозь сувайхнень богажснон. Запрещеннай предметтне эсток сявондевсть. Курокста мумс вастснон трибунатнень эса зрительхненди лезнесть волонтерхне. Ограниченнай возможность мархта ломаттненди, тяконь лувксса инвалиттненди-колясочникненди стадионца тифт специальнай вастт.
Стадионть потмоса сембось аноклафоль стане, штоба тиемс ломаттненди афкуксонь праздник: мишендевсь сувенирнай продукция, ярхцамбяльхть и симомбяльхть, ётафневсть аф фкя лацонь викторинат и конкурст. Стадиону
сувайхнень эсь морамаснон-кштимаснон мархта васьфнезь Мордовиянь артисттне и творческяй коллектифне.
Лангс ванозь од стадионць шарфни ши лангс. Тяконь ули кода азомс и сонь потмоширенц колга. Трибунатнень эса маштозь сотневсть акша-оранжевай тюсне, конат световой оформлениять вельде арсесть сядовок сельмос повикс. Аф ваномок сянь лангс, што вяре, трибунатнень вельхксса, уйсть шобда туцятне, стадионца ульсь лямбе и валда.
Россиянь и Мордовиянь гимнатнень кулхцондомда меле ушедсь налхкомась. Тя пингть «Мордовия» ФК-ть фонатскяй секторса эвондась «Од куд—од сяськомат» вал мархта баннерсь. Болельщикне, сембе вийса кирнезь эсь клубснон ширенц. Налхкомась «псиль», но аф ваномок несколька опаснай моменттнень лангс матчсь аделавсь 0:0 счетса.
Налхкомать аделамда меле журналисттнень кизефксснон лангс отвечасть РФ-нь Правительствать Председателец Виталий Мутко и МР-нь Оцюнясь Владимир Волков:
Виталий Мутко: —Мялезе поздравондамс Мордовия Республикань болельщикнень. Тячи минь сувафтоськ тевс футболть коряс Миронь чемпионатонь мекоальце главнай объектть—«Мордовия-Арена» стадионть,—азозе В.Л.Мутко.—Сембось ётась цебярь уровеньца, сембе систематне работасть лац: управлениясь, штабсь, коммуникациятне. Эряви азомс республикаса ётафтф пяк оцю работа благоустройствать коряс. Тячи тейнек удалась максомс оценка аф аньцек стадионти, но и од гостиницатненди. Мордовиясь достойнайста аноклась и ётафтозе васенце тестовай матчть.
Монь кизефнемазь газонть колга, Газонць цебярь. Теенза инь васенцесь – ункснень кемокстамасна. Эряви аф лама шивалда, кафта недялят лямбе погода – сембось кармай пяк цебярь.
Мялезе спасибамс сембонди, кие строясь стадионть эса, волонтерхнень, матчень организаторхнень. Сембе службатне тестировандафт. «Мордовия» клубти мялезе арьсемс сатфкст. Инголе сонь нинге кафта матченза. Эряви сяда лац анокламс и сяськондемс.
Владимир Волков: - Миронь чемпионатти анокламаса минь тяни лисеме финишняй прямойти. Инь главнай объектсь – стадионць, и гостиницатне, тяконь лувксса «Меркьюри» гостиницась – анокт. Задачать минь пяшкодеськ. Лац етафтоськ тестовай матчть.
Мялезе спасибамс сембонди, кие работась республикасонк. Благодарностень башка валхт мялезе азомс Россиянь Минспортти и Виталий Леонтьевиченди ширеньконь кирнеманкса. Ся, што Саранскяйсь анок Миронь чемпионатть ётафтоманцты, минь марстонь заслуганьке,—мярьгсь В.Д.Волков.
Конешна, минь учендоме сяськома команданьконь эзда, вдь сон васенцесь эсь лигасонза. Минь учендоме афкуксонь мазы налхкома. Команданьконди улема од стадионть корява, и зрительхнень, конат тяшкава кирнесазь ширенц.
Виталий Мутко: - Мялезе отмечамс, што футболсь Россияса вииякшни. Странаса работайхть пцтай 2500 футбольнай школа, конатнень эса занцихть пря 300 тежянть малава шаба. Мордовияса должетт налхксемс эсь воспитаникне. Тяни ни несколька воспитаниконте налхкихть 1,2 дивизиононь клупнень эса сембе странать келес. Тя пара. Работайхть специалистт.
Миронь чемпионатсь ламоти тонафтсамазь, тконь лувксса сянди, кода эряви кирнемс минценнетнень ширеснон. Кеман, футболоньке арай сяда цебярькс. Стадиону ломаттненди эряви сашендомс семьянек. Стадионца должен работамс wi-fi. Аф юкснема концертнай программатнень, развлечениятнень колга, штоба кеподемс ломаттнень мяльснон. Тянь ширде од стадионць – аськолкс инголи.