ПФО-са Президентть полномочнай представителец Игорь Комаров шарфтсь мяль: «Россия» Международнай выставкась странать общественнай эряфсонза арась ни ключевой событиякс — ваномонза сашендсь ни миллионда лама ломань. Кода отмечазе Россиянь Президентсь Владимир Владимирович Путин, тейнек ули мезенкса марямс гордость промышленностьса, наукаса, культураса, спортса, цифровой технологиятнень эса. Минь нинге весть няеськ тянь. Мордовиясь няфтьф выставкаса Великай шуфта лаца, конань унксонза — тя мокшэрзянь масторть историяц, ронгоц — тяса эряй ломаттне, лопатне — синь тевсна. Республиканьке — национальнай и религиознай согласиянь символхнень ёткста фкясь. Ялгат, поздравляндатядязь Мордовиять шинц панжеманц мархта».
Государственнай Думаса «Единая Россия» фракциять руководителец Владимир Васильев, мероприятиянь участникнень и инжихнень приветствовандамста, отмечазе: «Национальностсь — тя оцю вий, странать козяшиц. Тянь колга мярьгсь минь Президентоньке. Сембе минь кельгсаськ Россиять, сембе минь кельгсаськ Мордовиять. Мокшэрзятне — асу и великай народ, сембось тинь лиси! Арьсян Мордовиянь эряйхненди и сембе республикати панчфокс панжема!»
Республикать презентациянц мархта выступандась Мордовиянь Оцюнясь Артём Здунов. Сон азозе, кода эряй регионць и мезенкса маряй гордость. Республикать визитнай карточканза — Фёдор Ушаковонь храмоц, спортивнай объекттне, Н.П.Огарёвонь лемса МГУ-сь и ламось лиясь. « Инвестициятнень касфнемаснон коряс Мордовиясь тяни васенце вастса Приволжскяй федеральнай округса и сувси Россиянь кемонь инь цебярь региоттнень лувксс, - мярьгсь республикань Оцюнясь. - Тядде минь ламода келептеськ «Рузаевка» инголяй социально-экономическяй касондомань-вииякшнемань территориять границанзон. Минь панчсесаськ промышленно-производственнай типонь особай экономическяй зонать. «Биохимик» заводсь — Мордовиянь инь ташта фармацевтическяй предприятиясь. Тяниень пингть тяса ноляви 250 аф фкя лацонь лекарственнай препарат, конатнень 80 процентсна сувсихть инь эрявикснень лувксс. Коронавируснай пандемиять пингста предприятиятнень васенцетнень лувксса аноклась и ушедсь ноляма ковидть пчкафнеманкса препарат - «Арепливир». Тя лекарствась лездсь араламс тёжятть ломанень эряф. Тядде «Биохимикса» РФ-нь Президентть Владимир Путинонь поручениянц коряс панчф фармацевтическяй субстанциянь од производства. Тяни республикась работай Биотехнологиянь федеральнай центрать тиеманц коряс, тяса кармайхть ётафневома мировой уровенень исследованият. Тянь мархта машфтови омба масторонь лабораториятнень эзда ащемась. Тя важна Россиять лекарственнай безопасностенц обеспечендаманкса
Нинге фкя важнай предприятиясь — оптическяй волокнань заводсь. ЕврАзЭС-са минь фкя и тяка регионць, коса серийнайста ноляви оптоволокнось. Мордовиясь занцесы васенце строчкать промышленнай вагоностроенияса. «РМ Рейл» компаниясь — странаса грузовой машина кинь вагононь и контейнеронь инь оцю производительсь. Мордовиясь ульсь и лядонды светотехническяй промышленностень центракс. «Светотехника» всесоюзнай гигантть площадканц лангса Президентть поручениянц коряс и Россиянь Правительствать ширень кирдеманц вельде эреклафневи тяниень пингонь индустриальнай парксь.
Мордовиять гордостень маряма вастоц — велень хозяйствась и перерабатывающай промышленностсь. Тядде кочкаф сёронь рекорднай урожай — 2 миллиотт тонна. Республикась — лидер органическяй земледелиять коряс, странаса панчфонь фкя инь оцю производительсь».
Мордовиясь — тя нинге цебярь васта ваймосеманди. Пефтома паксятне, туста, иможса и панкса козя вирьхне, ёмла ляйхне и эрьхкне… «Кречет» сафари-парксь, Сире Теризморга, Паракино этно-велетне, коса ванфтфт мокшэрзятнень койсна-обуцясна, промысласна.
«Инь оцю козяшиньке — ломаненьке, трудонь кельгихть, смелхт, фалу сатнесазь арьсефть, сембе тяфтама аф фкя лацоннет, но пефтома кельгсазь шачема-касома масторснон иРоссиять! - мярьгсь Артём Здунов. - Мокшэрзянь масторть мархта сотфт ламоц историческяй личносттне. Тя аф сяськови адмиралсь Фёдор Ушаков, летчиксь — Советскяй Союзонь Геройсь Михаил Девятаев, скульпторсь Степан Эрьзя, врачсь-офтальмологсь Владимир Филатов, историксь Василий Ключевский, поэтсь Александр Полежаев, легендарнай певицась Лидия Русланова, философсь и литературоведсь Михаил Бахтин, татарскяй поэтсь Хади Такташ. Мокшэрзятнень эзда стане жа лиссь патриархсь Никон, минь мастороньконь лангса подвижничендась Серафим Саровскяй. Тернесайне сембонь минь республиказонк. Самок тяза весть, эвондай мяленте мрдамс одувок. Сембось, мезе минь тиеме, тиеськ Шкаень лезксть, Президентоньконь ширень кирдеманц вельде. Лездоза Шкабавазсь, штоба Мордовиясь касондоль-вииякшнель, штоба ломаттне сашендольхть тяза и кеняртькшнельхть»
Мордовия Республикань Оцюнять пресс-службац