Тядде фестивальсь ётафтовсь комсь сисемцеда. Темакс теенза кочкафоль «Мезьста ушеткшни Родинась?» кизефкссь. Пцтай кафта ковоньберьф республикань муниципальнай райоттне Саранскяйса, Культурань республиканскяй Дворецса, фкя-фкянь мельге няфнезь эсь отчётнай концертснон и декоративно-прикладной творчествань выставкаснон. А 23 декабрьста ульсь народнай творчествань фестивальть-конкурсть финалоц, сонь лауреатонь гала-концертоц.
Тядде «Шумбрат, Мордовия!» фестивальсь пуропнесь пцтай 4 тёжятть ломань республикань 140 ошста и населённай пунктста. Сембоц няфтьфоль 500 лама номер, конатнень ёткста инь цебярьхне сувафтовсть гала-концертти.
Артисттнень и ваныхнень приветствовандазень Мордовия Республикань Оцюнясь Артём Здунов. Сон шарфтсь мяль сянди, што пяк важна ванфнемс мокшэрзянь народть коензон-обуцянзон, культурнай козяшинц.
«Шумбрат, Мордовия!» илась – республиканьконь главнай фестивалец. Аньцек ваймос коре од ломаттненди ули кода участвовандакшнемс тяфтама мероприятиятнень эса. Сембе тинь пачфнесасть культурнай наследияньконь, конань тиендезь и ванфнезь атянь атяньке, сай пингти!» - мярьгсь Артём Здунов.
Мордовиянь Оцюнясь мярьгсь, што тяни кода аш мзярдовок пяк важна мяляфтомс эсь юрхнень, Родинать колга, тонафнемс тянди шабаньконь. Сон спасибась сембе земляконзонды, конат тяниень пингть аралакшнесазь странаньконь интересонзон, и синь семьяснонды. Тя шиня залса ульсь Мордовияса шачфсь-касфсь, Россиянь Геройсь Давид Малыйкин, кона тись оцю подвиг специальнай военнай операциять пингста. Пуромфне цяпасть теенза, а мархтонза Родинань сембе аралайхненди стяда ащезь. Шавф геройхне лятфтафтольхть минута кашт аф молезь ащезь…
Сяда тов региононь руководительсь макссь государственнай казнет культураса сатфксонкса и фестивальть эса активнай участиянь примаманкса. Тяфта, Старошайговскяй райононь Национальнай культурань центрань художественнай руководительсь Валентина Петровна Ямашкина Мордовия Республикань Оцюнять Указонц мархта казьфоль «За заслуги перед Республикой Мордовия» медальса. Аф кржати тя шиня максфоль «Мордовия Республикань культурань Заслуженнай работник» почётнай лемсь.
Тяфта жа Мордовиянь Оцюнясь казезень эрь-кодама номинацияса конкурсонь призёрхнень и сяськихнень.
«Открытие фестиваля» номинацияса сяськсь Ламбирскяй райононь Атемар велень искусствань идень школань «Дедовы внуки» ансамбльсь, «Дебют фестиваля» номинацияса – Саранск ошень 7№ идень садонь «Карамельки» коллективсь. «Хранители традиций» номинацияса казнеть сатозе Торбеевскяй районцта «Хранители доброй старины» этномодань театрась, «27 лет на фестивале» номинацияса – Инсарскяй районцта «Поюня» народнай фольклорнай ансамбльсь. Стане жа фестивалень участникненди максфтольхть казнет «Семьи героев» номинацияса – синь радня ломаньцна тяниень пингть аралакшнесазь странаньконь.
10 тёжяньда кржа населения мархта муниципальнай образованиятнень ёткста I степенень лауреатокс арасть Старошайговскяй райононь творческяй коллектифне, фестивалень гран-прить сатозь Теньгушевскяй райононь артисттне. «10 тёжяньда лама населения мархта муниципальнай образованиятне» номинацияса I степенень лауреатокс арасть Лямбирскяй райононь творческяй коллектифне.
Мордовиянь ошнень ёткса I степенень лауреатокс лувфтольхть Ковылкинскяй райононь артисттне, а гран-прить сатозь Саранск ошень округонь коллектифне.
Инь цебярь декоративно-прикладной творчествань выставкакс лувфоль Ичалковскяй районть экспозицияц.
Номинациятнень эса сяськихне получасть питни казнет Мордовиянь Оцюнять эзда, шабатне – од кизонь ламбама казнет.
Несколька киза мельцек марнек странаньконь эзга Россиянь Президентть инициативанц коряс ётафневи «Мялень кузня» всероссийскяй акциясь. Гала-концертса ульсть акциянь участникне Даниил и Савелий Сысуефне. Синь мяльснон мархта шарть Артём Здунов валхтозе Мялень кузнять лангста тяда инголе. Дугаттне тонафнихть Саранск ошень 38№ школаса и ёт ёмласта занцихть пря спортонь эрь-кодама видса. Эрь недяляня улендихть катокса, а вов эсь конькасна аш. Синь колгаст Даниил и Савелий арьсекшнесть кунара ни. Мордовиянь Оцюнясь пяшкодезе мяльснон. Артём Здунов казсь теест аф аньцек конькат, но и клюшкат, шайбат и Хоккеень центрав сертификатт.
Каземань церемонияда меле ушедовсь концертсь. Кода ни азоськ, сценать лангс тя шиня лисендсть цебярьхнень ёткста инь цебярьхне. Эрь морайсь, эрь кштийсь салась мяль, нят, мярьгат, ульсть аф самодеятелькай, а профессиональнай артистт. Залть келесь срадондсть вииста кядень цяпаматне, «Браво!» юватькшнематне.