Тя фестивальсь койс коре ётафтови РФ-нь Культурань министерствать ширень кирдеманц вельде и пуропнесыне странаньконь ведущай национальнай творческяй коллективонзон. Ваныхнень учендсазь васедемат Башкортостанонь, Бурятиянь, Дагестанонь, Мордовиянь, Татарстанонь, Чеченскяй республикань, Чувашиянь, Марий Элонь театратнень мархта. Сембе постановкатне ётафтовихть рузонь кяльс синхроннай перевод мархта.
Фестивальть панжемаса примась участия Мордовиянь Оцюнясь Артём Здунов. «Республиказонк састь кафкса театрат, тяконь лувксса брадоньке Севернай Кавказста, поволжскяй региоттнень эзда, - мярьгсь сон. - Спасибан Россиянь Культурань министерствати национальнай театратнень ширеснон кирдеманкса. Минь касонттама-вииякшнетяма эста, мзярда полафнетяма опытса. Тя фестивальсь — тянди цебярь кепотькс».
Фестивалень участникнень стане жа приветствовандазень «Театр-фестиваль «Балтийский дом» культурань Санкт-Петербургскяй государственнай учреждениять генеральнай директороц Сергей Шуб. «Тя фестивальсь эсь историянц пингста путешествовандась Россиянь эрь-кодама ошнень эзга и няфтезе, кодама оцю и лама ширденне Родинаньконь культурнай палитрац», - мярьгсь сон.
«Театральная осень» фестивальсь панжевсь Валентина Мишанинать «Куйгорож» пьсанц коряс спектакльть мархта.
Мордовия Республикань Оцюнять пресс-службац