Пяденцяста, 14 апрельста, Саранскяи рабочай визитонц рамкаса Российскяй Федерациянь Правительствать Председателенц заместителец Виталий Мутко етафтсь совещания, кона лемтьфоль ошть–организаторть 2018 кизонь футболть коряс миронь чемпионатть етафтоманкса анокламанцты.
«Мекольцеда республикасонт улемдон меле тяса тиф пяк оцю работа. Тячи минь улеме объекттнень эса, конат строявихть миронь чемпионатти. Отмечаса, што сембе вастова мольфтевихть оцю тефт. Важна ванфтомс сявф темпнень сяда товга», - мярьгсь Виталий Мутко.
Азфоль, што сембе арьсеф мероприятиятне етафневихть эряфс эсь пингстонза. Мезсь пяк важна, сяс мес строяви кой-кона объекттнень ули кода варжамс тевса пингта инголе. Курокста мольфтеви транспортнай инфраструктурать анокламац, гостиницатнень, стадионть, тренировочнай площадкатнень, аэропортть строямасна. Работай волонтерскяй программась.
Россиянь Правительствань зампредсь азсь благодарностень валхт республикань руквоводствати и лична МР-нь Оцюнять тевонзон тиендиснонды Владимир Волковонди оцю анокшить инкса, тяконь лувксса 2018 кизонь футболть коряс миронь чемпионатонь главнай объектть – «Мордовия Арена» - стадионть эса. Арьсекшневи, што тяддень июль ковти тяса видеви газонць.
Стане жа Виталий Мутко отмечазе, што арьсекшневи анокламс стадионть мархта управлениять моделенц, кона лезды тиемс сонь рентабельнайкс.
Безопасностень кизефкссь арси фкя инь васенцекс чемпионатти анокламста. «Безопасностень концепциять кемокстазе Россиянь Президентсь Владимир Путин и согласовандаф FIFA-ть мархта. Пуроптфт минцень сервисоньке. Безопасностень од элементсь – болельщикть идентификациянц карточкац, тяфта лемдеви FAN-ID», - поладозе Виталий Мутко.
Владимир Волковонь валонзон коряс, футболть коряс миронь чемпионатсь кады Мордовияса цебярь наследия. Тяфта, шумордамдонза меле гостиничнай номерхнень пялькссна етафтовихть жилой фонду. «Цебярь наследиякс арай стадионць. Миньцонк эвондай од аэропорт, кинь развязкат, тренировочнай площадкат. Саранскяйса строяви цебярь инфраструктура мархта од микрорайон – семботь тянь нолдасазь тевс ошень и республикань сяда товолдонь поколениятне», - мярьгсь МР-нь Оцюнять тевонзон тиендисна.