24 апрельста Владимир Волков етафтсь выездной совещания Саранскяйса аэропортовай комплексть реконструкциянц мархта сотф кизефкснень коряс. Республикань вятись ульсь постояннай пассажирскяй терминалть од зданиясонза, компаниять-подрядчикть мархта ванозень-корхтазень работатнень мольфтемаснон и путсь задачат строительствать вишкопнеманц коряс.
«Аэропортовай комплексть пассажирскяй терминалонц строямац – фкя инь важнай задачась, конань республикать инголе путнесы странань руководствась 2018 кизонь футболть коряс миронь чемпионатти анокламста. Объектсь макссома эсь пингстонза и нльне тяда инголе – 2017 кизонь 1 октябрти. Оцю ответственность тянкса путневи кода руководительть, стане и рядовой эрь строительть лангс!» - лятфтазе совещанияс пуромфненди Владимир Волков.
Кулхцондомок МР-нь строительстань и архитектурань министрть Виктор Цыгановонь и подряднай организациятнень вятиснон пассажирскяй терминалть од зданиянц строяманц мольфтеманц колга докладснон, республикань Оцюнять тевонзон тиендисна примась решения сувафтомс полафткст объектса работатнень пяшкотькшемань графикти. Тяфта, фасаттнень и вельхксть строямаснон мархта фкя пингста мярьгфоль кярьмодемс и лия мероприятиятненди. Корхтамась мольфтевсь площадкатнень потмоста инженернай сеттнень латцемаснон коряс работать колга, тяконь лувксса объектть связень линиятнень мархта обеспечендамац, а стане жа вокзалть маласта площадть благоустройстванц вишкоптомац.
Тяда башка, путфоль задача касфтомс объектса заняф рабочайхнень лувксснон 400 ломаньц и ладямс строительно-монтажнай работатнень пяшкотькшнемаснон кафта сменаса. Мордовиянь Минстройти марса объектть заказчиконц, ГОСУКС-ть мархта мярьгф 2 майть самс ладямс-петемс календарнай сембе платтнень-графикнень, тяконь лувксса – стройплощадкати эрявикс материалхнень и техникать пачфнеманц.
Владимир Волков макссь поручения од пассажирскяй терминалть строяманц коряс сембе кизефкснень кирдемс личнай контроль ала МР-нь Правителствать Председателенцты Владимир Сушковонди. Тяда башка, региононь вятись китькстазе, што од подрядчикть саманц мархта работатне объектть эса виензафтовсть, и тянь отмечазе Россиянь Правительствать Председателенц заместителец Виталий Мутко республикасонк улемстонза.
Мордовия Республикань Оцюнять Пресс-службац