Мордовияса строительнай материалхнень производстваснон виияфнеманц и синь кржа этаж мархта и аф питни куттнень строямста тевс нолнемаснон колга корхтафоль шуваланяста, 28 сентябрьста, Мордовия Республикань Оцюнять Владимир Волковонь совещанияса.
Корхтамась мольфтевсь республикань стройиндустриянь фкя инь сире предприятиять – силикатнай кирпицень Ковылкинскяй заводть эреклафтоманц колга. Республикань руководствась путсь задача мрдафтомс заводти тяда ингольдень статусонц, заводти, кона макссесь колма сятта лама рабочай васта райононь эряйхненди и аф весть ульсь строительнай комплексонь и стройиндустриянь предприятиятнень еткса аф фкя лацонь рейтинговай конкурсонь, тяконь лувксса общероссийскяень, участникокс и сяськикс.
Заводть сяда товолдонь эряфонц арьсеманц мархта тяни ни заняф предприятиясь-инвесторсь, конань планонзон эса строительнай материалонь производствать эреклафтомац, тяконь лувксса, предприятиять «визитнай карточканц» - силикатнай кирпицть и ячеистай бетонть. Тяни мольфтеви производственнай площадкатнень анокламасна и ремонтсна, оборудованиянь рамамась, предприятиять инженернай и дорожнай инфраструктуранц эреклафтомасна. Арьсекшневи келептемс производствать. Сембода лияда башка тяса кармайхть нолневома фундаментнай и стеновой блокт, черепица, плитка. Предприятиять эреклафнеманц коряс программать эряфс етафнемста арьсекшневи сявомс работас 100 ломань.
Владимир Волков отмечазе, што предприятияти од ваймепожфонь нолдамась ащи башка вастса власттнень работаса. Тяка пингть республикань вятись тердсь арьсемс сяда келиста: «Мекольце сатфокс должен арамс республикаса
кржа этажса кудонь строямать виияфнеманкса эрявикс материалхнень комплекснай производствать ладямац. Аф питни куттнень стройсемаснон вельде решандави райоттнень эса эряма васттнень аф сатнемаснон мархта сотф прябалась».
Мордовиянь Оцюнясь макссь поручения Правительствати анокламс мерат, конат лездыхть маластонь пингть ни строямс кржа этаж мархта васенце куттнень республикань сембе райоттнень эса. Синь арайхть пилотнай проектокс.
Путф задача, штоба ня эряма васттнень рамайснонды улель кода участвондамс льготнай ипотечнай кредитованиянь программать эса, а стане жа лия социальнай жилищнай программатнень эса.
Совещанияса примасть участия Мордовия Республикань Правительствать Председателец Владимир Сушков, сонь заместителенза – МР-нь экономикань, торговлянь и предпринимательствань министрсь Владимир Мазов и строительствань, транспортонь и дорожнай хозяйствань министрсь Виктор Цыганов, а стане жа Ковылкинскяй муниципальнай райононь оцюнясь Виктор Ташкин.
Мордовия Республикань Оцюнять пресс-службац