Владимир Волков етафтсь рабочай васедема аф маряень Всероссийскяй обществать президентонц Валерий Рухледевонь мархта

Владимир Волков етафтсь рабочай васедема аф маряень Всероссийскяй обществать президентонц Валерий Рухледевонь мархта

Мордовия Республикань Оцюнять нюрьхкяня пингс тевонзон тиендисна Владимир Волков 17 майста етафтсь рабочай васедема «Всероссийское общество глухих» инвалидонь Общероссийскяй общественнай организациять президентонц, инвалиттнень тевснон коряс Россиянь Президентть видеса Советонь членть Валерий Рухледевонь мархта.

Корхтамась мольфтевсь обществать региональнай отделениянц ширенц кирнеманц колга. Владимир Волков надияфтсь максомс лезкс Саранскяйса аф маряень Всероссийскяй обществать зданиянцты ремонтонь тиемаса. Стане жа ванфтольхть кизефксне, конат сотфт республикаса колаф маряма мархта ломаттненди телефонно-диспетчерскяй службать панжеманц мархта.

Валерий Рухледев азсь благодарностень валхт Мордовиянь вятити обществать региональнай отделениянцты сембе ширдень лезксонь макссеманкса и азсь надияма республикать мархта сотрудничестванди всероссийскяй и международнай мероприятиятнень етафтомаса. Аф маряень Всероссийскяй обществать президентоц отмечазе регионть вии спортивнай инфраструктуранц и азозе, што анок азомс мяль етафтомс Саранскяйса 2029 кизонь Сурдлимпийскяй кизонь налхкоматнень.

Владимир Волков азсь кемама сянди, што Мордовияти удалай достойнайста примамс тяшка оцю пялькстоматнень. «2014 кизоня Сараснкяйса етафтфоль ни аф маряй спортсметтнень еткса уендемать коряс Европань чемпионатсь. Тяниень пингть минь вяттяма оцю работа 2018 кизонь футболть коряс Миронь чемпионатти анокламанкса, решандакшнесась кизефкснень инжихненди эряма вастонь макссемать, аэропортть реконструкциянц коряс. Нолнемок тевс футбольнай чемпионатть наследиянц, тейнек вийс коре кармай аф фкя лацонь спортивнай и культурнай мероприятиятнень етафнемасна», - китькстазе Владимир Волков.

Васедемаса стане жа ульсть Мордовиянь Правительствать Председателенц заместителец Галина Лотванова, Мордовия Республикань Оцюнять Администрациянц вятиенц заместителец – внутренняй политикать коряс Управлениять начальникоц Валерий Маресьев, «Всероссийское общество глухих» инвалидонь Общероссийскяй общественнай организациять Мордовскяй региональнай отделениянц председателец Ольга Зубаровская.

Мордовия Республикань Оцюнять Пресс-службац