19 сентябрьста Мордовиянь Оцюнясь Владимир Волков етафтсь рабочай совещания Ростехнадзорть Волжско-Окскяй управлениянц вятиенц Константин Давыдовонь мархта. Корхтафоль МР-ть эзга технологическяй и энергетическяй надзоронь территориальнай отделть рабонц итогонзон колга, 2018-2019 кизонь уштомань пингти республикань муниципальнай образованиятнень анокламаснон квалма.
Васедемать ушедомста Константин Давыдов спасибась Мордовиянь Оцюняти футболть коряс миронь чемпионатти анокламста марстонь работать инкса. «Чемпионатонь сембе объекттне, конат эвондасть Мордовияса, строяфт цебярь качестваса и эсь пингстонза! Саранскяйса чемпионатть етафтоманцты максф лама оцю оценка инжихнень и чемпионатонь участникнень ширде – кеман, што объекттне кармайхть работама республикать виияфнеманкса».
Владимир Волков, эсь ширденза, отмечазе надзорнай ведомствань работникнень оцю профессионализмаснон: «Роспотребнадзоронь сотрудникне мундиальти анокламань васенце шистокиге трудендасть фкя инь оцю объекттнень эса: «Мордовия Арена» стадионца, Саранскяень аэропортовай комплексса, энергетикань объекттнень эса, пяшкотькшнемок эсь работаснон пяк курокста».
Башка мяль васедемаса шарфтфоль республикань жилищно-коммунальнай хозяйствань объекттнень сексети-тялоти анокламаснонды. Тяконь лувксса корхтамась мольфтевсь лямбса ломаттнень обеспечендамаснон, а стане жа ресурсоснабжающай организациятнень инголе шумоть пандоманц колга.
Тяда башка, Волжско-Окскяй управлениять вятиец пачфтсь республикань Оцюняти «Реформа контрольной и надзорной деятельности» программать пяшкотькшнеманц колга. Программась водендаф предпринимательскяй тевонь вяти организациятнень и граждаттнень лангс административнай сталмоть кирьфтаманкса.
Васедемаса примасть участия МР-нь Правительствать Председателенц васенце заместителец – жилищно-коммунальнай хозяйствань, энергетикань и населениять гражданскяй араламань министрсь Игорь Чадов, а стане жа
Мордовия Республикать эзга Ростехнадзорть Волжско-Окскяй управлениянц вятиенц заместителец Владимир Расшивалин.
Мордовия Республикань Оцюнять пресс-службац