Вержиста, 11 июльста, Владимир Волков етафтсь келептьф совещания, конань эса ульсть Правительствань и Мордовиянь Оцюнять Администрациянц членонза. Корхтафоль республикать касондоманкса-вииякшнеманкса водендаф проекттнень колга.
Мордовиянь Оцюнясь китькстазе, што инь лама вийсь водендама национальнай проекттнень эряфс етафнеманкса, конатнень азозень Россиянь Президентсь, и конат сотфт странать научно-техническяй и социально-экономическяй касондоманц-вииякшнеманц, населениять касфнеманц и Россиянь ломатттнень эряфснон цебярьгофнеманц мархта.
«Тячи тейнек башка оцю мяль шарфнема ся кизефкснень лангс, конат ащихть васенце вастса республикати и сонь эряензонды, кода – эряма вастонь и кинь строямась, эряманкса цебярь условиянь тиендемась, ЖКХ-са порядкань тиендемась, аварийнай эряма вастста ломаттнень етафтомасна, здравоохраненияса, образованияса, культураса аф фкя лацонь проекттнень эряфс етафнемасна, рабочай од вастонь панчсемась. Вяре азф эрь направленияс коре улихть программат и проектт федеральнай бюджетста софинансирования мархта, и эряви, штоба республикась прималь участия эряензонды полезнай сембе программатнень и проекттнень эса!»
Кулхцонтфтольхть республикань министронь кабинетонь члеттнень докладсна касондомань-вииякшнемань проекттнень эряфс етафнемаснон коряс.
Дорожнай хозяйстваса фкя инь васенцекс азф – Саранск ошть Обходонц шумордамац, Строительная ульцять эзга машина кить и Инсар ляйть туркс путепровод мархта автомобильнай од кить строяманц ушедомац, а стане жа «Безопасные и качественные дороги» приоритетнай проектти Саранскяй ошень агломерациять сувафтомац и Саранскяень аэропортста международнай чартернай рейснень пяшкотькшнемасна. Решандакшнемс задачать, кона путф Президентть мархта, тевс сувафтф эряма васттнень объемснон 1,5-крда касфтоманц коряс, МР-нь строительствань и архитектурань министрсь Виктор Цыганов азсь мяль тиемс льготнай кредитованиянь программать вельде, сявондемок мяльс республикань эряйхнень лувксснон, конат вешихть эряма вастонь условиятнень цебярьгофнемаснон – тячиень шити тя 26 тежянь ломань. Башка корхтафоль «Молодая семья» программаса республикать участвондаманц колга.
Велень хозяйствать коряс фкя инь васенцесь – животноводческяй и перерабатывающай комплекснень сяда товолдонь виияфнемасна, сельхозпроизводительхнень кредитса ширеснон кирнеманц ванфтомац.
Башка мяль Владимир Волков шарфтсь Мордовиять социальнай ширдень федеральнай проекттнень эса участиянь примаманцты. Здравоохраненияса – тя онкополиклиникать строямац, велень ФАП-нь и больницятнень ремонтсна и од оборудованияса козякофнемасна, образованияса школатнень и идень саттнень строямасна и петемасна. Стане жа корхтафоль Миронь чемпионатонь наследиять лац тевс нолнеманц, туризмать виияфнеманц колга.
Вафтольхть совещанияса и регионть бюджетонц мархта сотф кизефксне, 2019 кизоти сонь пуроптомац. Стане жа Владимир Волков лятфтазе пуромфненди, што республиканскяй казнать пяшкотькшнемста и государственнай финанснень карьхцямста фалу кирнема мяльса пандомань дисциплинась.
Мордовия Республикань Оцюнять пресс-службац