Вержиста, 9 августста, Мордовиянь Оцюнять аф оцю пингс тевонзон тиендисна Владимир Волков ульсь «Юбилейный» ЖК-нь 2-це микрорайонца и «Тавла» ГЖК-са. Тя мезть башка мяль шарфтфоль од микрорайонца строяви бульварть эса мольфтеви тефненди. Бульварсь етай Севостопольскяй ульцять эзда сявомок «Тавла» ГЖК-ть эзга «Мордовия-Арена» стадионти молемс участкаса.
Од бульварть кувалмоц – 800 метрада лама. Сяда тов бульварсь поладови Севостопольскяй ульцять эзга кить омба ширеванза – 3-це и 4-це микрорайоттнень эзга и аделави Тавлать кереж беряксонза, коса строяви од храм.
Бульварсь кармай педа-пес пешеходнай, сонь ацасазь аф фкя тюсонь тротуарнай плиткаса, а стане жа тяса ладяйхть ваймосеманди скомнянят, озафтыхть панчфт, кусторкскят и шуфтонят.
Бульварть кувалмос тяни ни ацави машинатненди арнемс асфальтонь кись – келелмоц 6 метрат эрь ширеста, латцевихть бордюратне. «Главнайсь – обеспечендамс строительнай материалса строительхнень! Лотксемат тяст уле!» - мярьгсь Владимир Волков.
Региононь вятись вешсь подрядчикть эзда касфтомс объектса рабочайхнень лувксснон. Тяфтама задача путф «Тавла» ГЖК-нь омбоце микрорайонца кинь строямань сембе объекттнень эса. «Строительнай сезонць шумордама лангса. Ломаттне эряйхть ни од кудса, сяс китне и тротуархне пяк эрявикст! 1 сентябрьста минь панчсаськ тяса од школать, коза эрь шиня кармайхть сашендома сядот шаба, сяс бульварсь и марнек дорожнай инфраструктурась должетт улемс анокт! Работамс эряви кафта сменаса сисем шит недяляти», - китькстазе Владимир Волков.
Бульварть фкя пяльксонц ваномста, кона етай «Тавла» ГЖК-ть эзга, Владимир Волков макссь поручения кярьмодемс строительнай карьхчнень и вагончикнень эзда территориять урядаманцты, штоба тяса пингонь аф юмафнезь ушедоволь пешеходнай кинятнень и машинань кить педа-пес тиемасна.
Од микрорайонца сембе вийса мольфтеви эрямань куттнень строямасна. Кепотьфт ни зданиятнень коробкасна, етафтфт инженеранй сеттне, мольфтеви зданиятнень потмоширдень и лангонь отделкасна. И хуш
подрядчиксь кемай, што сембе объекттне кармайхть сувафтфт тевс тяддень кизоть аделавомс, Владимир Волков тясовок путни задача касфтомс рабочайхнень лувксснон, а главнайсь – эрямань васттнень строямаснон мархта ряцок кярьмодемс маластонь территориятнень благоустройстваснонды.
Мордовия Республикань Оцюнять Пресс-службац