Владимир Волков казезень «Октябрьская» агрофирмань инь цебярь работникнень

Владимир Волков казезень «Октябрьская» агрофирмань инь цебярь работникнень

Еткшиста, 11 ноябрьста, Мордовиянь Оцюнясь Владимир Волков поздравляндазень «Октябрьская» агрофирмань работникнень Велень хозяйствань и перерабатывающай промышленностень работниконь шить мархта и макссь казнет инь цебярь сотрудникненди. Мероприятиясь етась Лямбирскяй райононь Оцю Елховка велень ДК-ть залса.

«Тя кизоть тинь шумордасть «ветес». Мелянь кизось республикань велень хозяйствань отрасляти арась инь цебярькс сембе историянц пингста! – отмечазе Владимир Волков. – Цебярь результатт сатфт велеряйхнень оцю трудснон вельде».

МР-нь Оцюнять валонзон коряс, башка васта сембе ня кизотнень занци «Октябрьская» агрофирмась, кона арси тевти малаткшнемань примеркс.

Предприятиясь васенце вастса од технологиятнень тевс нолнемаснон, строительствать, производствань объемтнень касфнемаснон коряс.

«Аф стак Лямбирскяй районць тага сяськсь «Район эффективного ведения сельскохозяйственного производства» номинацияса, а Иван Семенович Андинонди макссть почетнай казне велеть эреклафнеманкса, и тага весть агрофирмась получазе призть инвестиционнай проекттнень эряфс етафнеманкса, конат етафневихть эряфс эсь средстватнень вельде», - китькстазе В.Д.Волков.

Велень хозяйствась – республикань экономикать фкя инь касонды-вииякшни отрасляц. 9 ковонь итокнень коряс велень хозяйствань производствать касомац арась пцтай 7,5 процент. Пищевой и перерабатывающай промышленностень предприятиятнень мархта нолдаф мелянь кизоть коряс 6 процентта сяда лама продукция.

«Тядде получаф 1 миллион 450 тежянь тонна сера. Тя инь цебярь результатсь республикать сембе историянц пингста! Тя велень хозяйствань кизось аф теждяль. Савсь кирдемс кафта чрезвычайнай ситуацият вельф начкть и кельмотнень коряс. Ульсть оцю пелемат урожайть инкса, башка корматнень коряс. Но минь сафтоськ! – азозе Владимир Волков. Зерновойхнень урожайностьсна пачкодсь 34, 4 центнерс гектарста. Тяфтама урожайность республикась сатсь васенцеда, етамок 2009 кизонь рекордонц!»

Сатфти эсь оцю путксонц путозе Лямбирскяй районць, кона арась лидеркс урожайность коряс – 50 лама центнер гектарста. Инь оцю валовай сборсь – 22 тежянь тонна 63 центнер гектарста урожайность пингста – получаф «Октябрьская» агрофирмаса.

Тяса лама лофца потяви фкя траксста – 9 тежятть килограмма. Предприятиять Елховскяй отделенияц арьсекшни получамс кизоть коряс 10,5 тежянь килограмма.

Производствать мельге цебярьгофневи и социальнай сферась. Владимир Волков надияфтсь агрофирмань работникненди, што 2018 кизоня ушедови Протасова велеса кить строямац, строяви кись Масловкаса.

Предприятиянь работникнень стане жа поздравляндазь Мордовия Республикань Правительствать Председателенц васенце заместителец – велень хозяйствань министрсь Владимир Сидоров, Лямбирскяй райононь оцюнясь Шамиль Давыдов.

«Агрофирма «Октябрьская» АО-ть генеральнай директороц Иван Андин азсь благодарностень валхт республикань руководствати и лична Мордовиянь Оцюняти В.Д.Волковонди.