15 сентябрьста Мордовиянь Оцюнясь Владимир Волков етафтсь рабочай совещания «Т Плюс» ПАО-ть генеральнай директоронц Андрей Вагнеронь мархта. Корхтамась мольфтевсь сотрудничендамать колга и регионть столицаса теплосетевой хозяйствать одкстоптоманц квалма.
Тялоти анокшить колга корхтамста «Т Плюс» Мордовскяй филиалть директоронц тевонзон тиендисна Сергей Мишанин пачфтсь сянь колга, што компаниять объектонзон эса Саранскяйса тиф капитальнай ремонт основной оборудованияти, мезенкса карьхцяф 340 миллион цалковай. Тяда башка, теплоснабжениять надежностенц касфнеманкса тиф ремонт и реконструкция 29 вайгяльбень кувалмоса теплосетьтненди, карьхцяфоль 380 миллион цалковай.
Модернизациянь программать коряс полафтф пси ведень 11 вайгяльбень кувалмоса трубат Лихачева, Косарева, Т.Бибинать лемса, Пуркаева, Гожувскяй, Веселовскяй ульцятнень эса, Ст.Эрьзянь бульварса и Октябрть 60 кизонцты проспектса.
Кизоньберьф тиф реконструкция Васенко, Коммунистическяй, Войнова, Семашко, Б.Хмельницкяй, Ботевградскяй ульцятнень эса автомобильнай китнень эзга тепломагистральхненди.
Владимир Волков шарфтсь мяль сянди, што сембе работатне пяшкодемат эсь пингстонза. «Ломаттненди аф кельгови, мзярда теплосеттнень ремонтснон коряс работатне мольфтевихть поздна сексенда пиземть ала, а меле нинге ошть территорияса лядондыхть шувф лоткт. Тянь нолдамс аш кода», - китькстазе Мордовиянь Оцюнясь.
Стане жа совещанияса корхтамась мольфтевсь республикаса теплоснабжениять виияфнеманц колга. Азфоль, што теплосетевой инфраструктурась регионца эряви одкстоптомс. Решандамс прябалать и водендамс инвестицият отрасляти ули кода, кда Саранскяйсь етафтови теплоснабжениянь ценовой зонав и меле ули кемокстаф конссеционнай соглашения.
Од рынкас етамста арьсекшневи пяшкодемс несколька мероприятия, конатнень ули социальнай эффектсна. Тяфта, оцю средстват (150 миллионда лама цалковай) ули нолдаф ошень муниципальнай сеттнень петеманкса. Стане жа компаниясь ерасы одкстоптомс Саранскяйса пси водоснабжениянь сеттнень, тянкса сави карьхцямс 658 миллион цалковай. Тя цебярьгофтсы пси ведть пачфнеманц.
Владимир Волков азсь мяль пуроптомс проектть эряфс етафтоманц коряс рабочай группа. «Кда ошть ценовой зонав етамац решандакшнесыне лямбоса и пси ведьса эряйхнень обеспечендамаснон коряс задачатнень, эста тейнек молема тянди», - китькстазе региононь вятись.
Андрей Вагнер отмечазе кизефксть оцю социальнай значениянц и азозе, што Т Плюс компаниясь анок водендамс средстват ресурсоснабжениять качестванц цебярьгофнеманкса. «Единай теплоснабжающай организациять эвондакшнихть дополнительнай обязательстванза ошень теплоснабжениянь марнек системать виияфнеманц, энергоресурснень пачфнемаснон качестванц касфнеманц коряс, - азозе компаниять генеральнай директороц.
Тяниень пингти теплоснабжениять ценовой зонав етаманц коряс решениять Россиять европейскяй пялькссонза примазь Ульяновскяйса, Оренбургса, Владимирса и Самараса.
Мордовия Республикань Оцюнять пресс-службац