Владимир Волков: «Мордовия-Аренаса» васенце тестовай матчсь должен няфтемс сембе службатнень Саранскяйса 2018 кизонь миронь чемпионатть етафтоманцты анококс улемаснон»

Владимир Волков: «Мордовия-Аренаса» васенце тестовай матчсь должен няфтемс сембе службатнень Саранскяйса 2018 кизонь миронь чемпионатть етафтоманцты анококс улемаснон»

18 апрельста Мордовиянь Оцюнясь Владимир Волков етафтсь совещания, кона лемтьфоль 21 апрельста «Мордовия-Арена» од стадионца васенце тестовай матчть етафтоманцты анокламати. Мероприятияса примасть участия министерствань и ведомствань, стадионть строяманц заказчиконц и подрядчиконц, федеральнай структурань, волонтерскяй и лия организациянь представительхне.

Владимир Волков эсь корхтамасонза башка китькстазе, што васенце тестовай матчсь етафтови сянкса, штоба практикаса няемс Саранскяйса матчнень етафтоманкса ответственнай сембе службатнень работаснон и анокшиснон. «Башка мяль эряви шарфтомс безопасностень и стадионца навигациянь кизефксненди. Эряви, штоба тестовай матчень сембе участникне – болельщикне, СМИ-нь представительсна, организаторхне, обслуживающай персоналсь – лац содалезь стаионть эзга етамань схемать. Тянь эзда ащи тежятть ломаттнень безопасностьсна», - отмечазе республикань Оцюнясь.

Арьсекшневи, што «Мордовия-Аренаса» васенце матчть етафтомста тестировандавихть и транспортнай схематне, конат арьсефт чемпионатть пингста стадиону зрительхнень пачфнеманкса, тяконь лувксса – специальнай автобуснень-шатлатнень эса. Вантсазь тевса эсь работаснон и волонтерхне, медицинскяй службань сотрудникне, контролерхне-распределительхне, безопасностень службатне.

Башка мяль совещанияса шарфтфоль тестовай матчть пингста праздничнай программати. Учендови, што матчть ушедомс и перерыфнень пингста стадионть маласа кармайхть работама творческяй коллектифне, несколька фан-площадка, кармайхть налхксемат-месть шабатненди.

Владимир Волков китькстазе: «Чемпионатонь ключевой объектть – «Мордовия-Арена» стадионть панжемац – оцю события марнек республикати. Эряеньке кармайхть улема мировой спортивнай первенствань объектть эса, и важна, штоба тя васенце оцю мероприятиясь стадионцонк араль мяляфтовикс!»

Тяда башка, республикань Оцюнясь макссь поручения организаторхненди, штоба васенце тестовай матчть обязательна ванолезь мокшэрзянь футболть

ветеранонза, афкуксонь болельщикне, тя налхкомань кельгихне, конатненди футбольнай стадионть панжемац – афкуксонь праздник.

Лятфнесаськ, што васенце тестовай матчсь «Мордовия-Арена» стадионца етай 21 апрельста 17.00 частста. Футболть коряс Россиянь Первенствать рамкаса Профессиональнай футбольнай лигань командатнень-клупнень еткса «Мордовия» футбольнай клубсь васеди Удмуртияста инжихнень – «Зенит-Ижевск» командать мархта.

Билеттнень матчс ули кода рамамс «Старт» стадиононь касатнень эса (адрессь: Московскяй ульцясь, 12 кудсь). Билетть питнец – 100 цалковай. «Мордовия-Арена» стадиону сувамась панжеви кафта частта налкхомать ушедомда инголе.

Мордовия Республикань Оцюнять пресс-службац