Койс коре Победань шись Мордовиять столицаса васьфтьфоль несколька торжественнай мероприятияса. Шить васенце пялестонза Саранскяйса етасть лятфнемань торжественнай митингсь, великай Победать лемс парадсь. Торжественнай шествиясь мольсь мемориальнай калмотненди, коса калмафт военнай госпиталень пациенттне. Традицияс коре, шествиять вятезь военнай джипне, коса озсефтольхть ветераттне. 15.00 частса етась «Бессмертный полк» шествиясь.
Торжественнай мероприятиятнень панжезень Мордовия Республикань Оцюнять тевонзон тиендисна Владимир Волков. Эсь корхтамасонза сон отмечазе Великай Победать странаньконди оцюдонга оцю значениянц:
«Тячи минь сотнефтама фкя пяк кеме сотксса. Лемоц сонь – народть мялямоц… Маень тя шитнень Победась сувси эрь кудти. Сон арси малакс эрь ломанти.
Именна тя святой мялямсь тиендьсамазь минь виикс! Лезни молемс инголи и сяськондемс. И тячи, кода аш мзярдовок, минь марьсесаськ пряньконь фкя народкс, фкя странакс». Владимир Дмитриевич башка китькстазе ветераноньконь оцюдонга оцю подвигснон:» Тячиень шить оцю кеняртьксоц суваф сельмоведьса и стака сярятьфса, тячиень шись пантф 27 миллион ломанть эряфса. Пцтай эрь семьясь юмафтозень эсь радна и мала ломанензон.
Мордовиянь кафта сятт нильгемонь кота тежятть стирсь и церась тусть врагть каршес тюрема. Эрь омбоцесь ашезь мрда…
Республикасонк шачфне-касфне тисть героическяй подвигт сембе фронттнень эса: Брестскяй крепость, Москуть, Ленинградть араламста, Сталинградть ала и Курскяй дугаса тюрематнень эса, Украинань и Белорусиянь модатнень лангса.
Етксост полководецт и рядовойхть, летчикт и морякт, танкистт и разведчикт, военврачт и медсестрат. Синь максозь победать инкса семботь мезе маштсть.
Синь кулсесть, штоба эряль Родинась, штоба эрялеме минь! Штоба минь мяляфтолеськ…»
Стане жа Мордовиянь лидерсь китькстазе поколениятнень еткса сотксть ванфнеманц эрявиксшинц. Фронтовикнень опытсна и сатфкссна должетт арамс кинь няфтикс тяниень поколениять сяськондемаснонды, сатфксснонды. «Тячи од ломаненьке мярьгихть – «Спасиба атяньконди сяськоманкса!». Ня простой валхнень эса крхка смузь, историяньконь сембе виец. Минь долгоньке поколенияста поколенияс макссемс народоньконь героизманц колга «видешинь эстафетать».
«Минь – народ-сяськонди!» - шумордазе эсь выступлениянц Владимир Волков. Вечнай толть ингольде площадсь «сязевсь» «Ура!» ювадемаса, МВД-нь даннайхнень коряс Саранскяйса мероприятиятнень эса примась участия 17 тежянь ломанць, а республикать эзга – 43 тежянь ломанць.
Великай Отечественнай войнань ветеранць Александр Иванович Марков корхтась аф лама. «Эздонк, 20 веконь инь пелькс войнань толу-качаму китнень эзга етайда лядонды коль сяда кржа. Сяськоманьконь колга мялямть минь кода эстафетань макссесаськ од поколенияти». Площадсь тага сязевсь «Ура!» ювадемаса.
5№ школань тонафнисьАлександр Зинин азондсь эсь атянц колга, кона шавовсь тюремань паксяса.
Меле Вечнай толти путфтольхть панчфт. Торжественнай маршса «Родина-мать» монументть ингольге етась праздничнай парадсь. Фкя стройса етасть Вооруженнай виень, МВД-нь, Росгвардиянь офицерхне, юнармеецне, кадеттне и од казакне.
Тяда меле колоннась тусь мемориальнай калмотненди.