Владимир Волков азондсь предприятиянь сотрудникненди сянь колга, што тяддень апрель ковста Россиянь Президентть В.В.Путинонь мархта васедемаснон пингста башка корхтафоль светотехническяй отраслять виияфнеманц колга. «Президентсь содай «Лисмать» колга, тинь трудовой сатфксонтень квалма. Мон пачфтине В.В.Путинонди, што минь башка мяль шарфнетяма ся отраслятнень виияфнемаснонды, конатнень коряс сатнефтольхть аф кальдяв сатфкст кунарокиге. Васендакиге тя светотехникась. Тячи странаса эрь колмоце лампочкась нолневи Саранскяйса. И минь работатама сянь лангса, штоба лисемс эрь омбоцеть лангс. Президентсь кирдезе тянь коряс ширеньконь, и арьсесь тинь трудовой коллективонтенди сатфкст! Азсь привет, мезть мон тячи и тиса», - залса кядень цяпаматнень коряс мярьгсь республикань вятись.
Мордовиянь Оцюнять аф оцю пингс тевонзон тиендисна Владимир Волков республикаса промышленнай политикать эряфс етафнеманц колга. Вете кизоста промышленнай производствань объемтне регионца кассть 22 проценттта. Сон китькстазе, што Мордовиянь руководствась сяда товга кармай кирнема предприятиятнень ширеснон, решандакшнемост задачатнень трудть производительностенц касфнеманц коряс, водендакшнемс инвесторхнень. Поладови работась наукоъемкай экономикать пуроптоманц кинновационнай промышленностть и кластерхнень виияфнемаснон коряс. «Миньцонк тянкса сембось ули. Мордовиясь странаса васенцетнень еткса промышленнай производствать марстонь объемсаинновационнай продукциять пяльксонц коряс, кона пачкотькшни 28 процентс. Светотехническяй предприятиятнень эса тя показательсь пачкотькшни 50 процентс. Тяни ни Мордовияса пуропневи Россиянь промышленностень од
отрасля – оптоволоконнай приборостроениясь. Тя оцю задача сембе странаса», - китькстазе Владимир Волков.
Республикань лидерсь азозе, што экспортть виияфнемац лихневи васенце вастти регионть экономикаса. «Колма кизоста экспортсь Мордовияста кассь 2,5-крда, 4 миллиардста сявомок 10 миллиардс молемс», - азозе республикань лидерсь. Маластонь вете кизотнень экспортсь касфтови 3-крда. Экспортть виияфнемаса башка оцю васта занци «Лисма» ГУП-сь. Мелянь кизоть итогонзон коряс выручкань марстонь объемть эса экспортть пяльксоц пачкодсь 18,5 процентс. Латцевихть соткст Чехияста, Венгрияста, Иранцта, СНГ-нь странатнень эзда партнерхнень мархта. Меля «Лисмась» кемокстась марстонь предприятия Бурундиса. Тяддень июньцта Бурундив пачфтьфоль 300 тежянь долларонь питнеса васенце продукциясь. Производствать тевс нолдави 2017 кизонь октябрьста. Продукциянь пачфнемань географиять келептемста арьсекшневи касфтомс предприятияса экспортть пяльксонц 25 процентс молемс. «Минь целеньке – занямс африканскяй рынкать, лисемс транснациональнай уровеньц. Минь кематам, што од компаниять оцю сай пингоц», - мярьгсь Мордовиянь Оцюнять аф оцю пингс тевонзон тиендисна.
Владимир Волков азондсь республикать социально-экономическяй ширенц колга. «Вете кизоста Мордовиять виияфнеманкса нолдафоль 260 миллард цалковай. Тяп як оцю ярмакт, конат тусть ламоц эрявикс проекттнень эряфс етафнеманкса- заводонь и фермань, эряма вастонь и идень садонь, здравоохранениянь, культурань, спортонь объектонь строяманкса, куд пирьфнень благоустройстванкса, куттненди ремонтонь тиеманкса, од рабочай вастонь панжеманкса», - отмечазе региононь лидерсь. Сон азондозе республикать социально-экономическяй курсонц васенце целенц. «Сембода главнай задачась – зарплататнень и ломаттнень афкуксонь доходснон курокстонь касфнемасна, од рабочай васттнень панчсемасна. Мекольдень вете кизотнень минцонк панчф 15 тежянь рабочай васта. 2020 кизоть аделавомс панжеви нинге 9 тежятть од рабочай васта. Зарплатать коряс Мордовияти удалась тумс мекольце вастть эзда Россиянь региоттнень еткста. Тя оцю сатфкс. Вете кизоста сонь касомац пачкодсь 75 процентс, афкуксонь зарплатать касомац – 21 процент. Но минь шарьхкотькшнесаськ, што тя аф сатомшка. Маластонь вете кизотненди инголенк ащи задача – эрь кизоня заработнай платать касомац должен улемс 1,5-крда сяда оцю средняйста странать эзга, и кафтонь-крда сяда оцю инфляциять коряс», - мярьгсь Владимир Волков.
2013 кизоста сявомок «Лисма» ГУП-са средняй зарплатась кассь кафтонь-крда, 12300 цалковайста сявомок 2013 кизоня 23600 цалковайти молемс мелянь кизоть итогонзон коряс. Маластонь кафта кизотнень средняй зарплатась предприятияса должен касомс сембода емлась 30 тежянь цалковайс. Мордовиянь лидерсь тердезень «Лисмань» и республикань лия предприятиятнень вятиснон водендакшнемс производствазост од ломатть, паннемс теест достойнай зарплата, решандакшнемс синь эряма васттнень мархта сотф прябаласнон. Эряма вастонь прябалатнень решандаманкса республикаса сяда тов поладови льготнай ипотекать виияфнемац. Работай 5 процент алу льготнай ипотекань программась. Программань участникокс арасть ни 3 тежятть ломанць.
«Штоба аф юмафтомс Мордовиять вастонц светотехническяй отрасляса, 5 кизода тяда инголе минь примаме решения кластерхнень пуроптомаснон коряс. Тячи сонь участникокс арасть 43 предприятиясь, «Лисмась», конешна, еткстост фкя инь васенцесь. Тя пингста марстонь вийса тейнек удалась получамс афкуксонь результат. Кластерть виияфнеманкса водендаф пцтай 5 миллиартт цалковай. Панчф кафта тежяньда лама од рабочай васта. Башка отмечаса, што 5 кизоста трудть производительностец светотехническяй отрасляса кассь кафтонь-крда! Меля тя – 1 миллион 200 тежянь цалковай фкя ломанть лангс. Мзярда 2012 кизоня пуропнеськ светотехническяй кластер, тя показательсь пачкотькшнесь аньцек 450 тежянь цалковайс. фкя ломанть лангс. Мелянь октябрьста «Светотехника и оптоэлектронное приборостроение» инновационнай кластероньке арась сяськихнень еткста фкякс Россиянь Минэкономразвитиять конкурсса. Тячи тя странаса фкя и тяка центрась, кона заняф светотехникать, освещениять, волоконнай оптикать и оптоэлектроникать мархта», - китькстазе Владимир Волков.
Стане жа Мордовиянь оцюнять аф оцю пингс тевонзон тиендисна отвечась «Лисмать» трудовой коллективонц рабочаензое кизефксснон лангс. Синь сотфтольхть социальнай инфраструктурать виияфнеманц, кинь строямать аф аньцек Саранскяйса, но и велетнень эса.