Владимир Волков: «Од отраслевой министерстватненди содама, кода лац вятемс теест максф тефнень»

Владимир Волков: «Од отраслевой министерстватненди содама, кода лац вятемс теест максф тефнень»

Мордовиянь Оцюнясь Владимир Волков 22 сентябрьста примась участия котоце созывонь МР-нь Государственнай Собраниять кемготувоце сессиясонц работаса.

Заседанияса васендакиге ванфтольхть МР-нь Правительствань Председательть, Правительствань Председательть васенце земестителензон и заместителензон, а стане жа Мордовия Республикаса ломанть праванзон коряс Уполномоченнайть должностьс кандидаттне.

Владимир Волков, депутаттнень инголе корхтамста, китькстазе, штомекольдень кизотнень лама тиф сянкса, штоба властсь республикаса улель сяда результативнай и панжада. Арась сяда лама шарьхкодема и ладяф марстонь работа федеральнай властень территориальнай оргаттнень мархта.

«Тя ширеса сатфксоньке отмечафтольхть Россиянь Правительствать, Экономическяй развитиянь министерствать мархта. Исполнительнай властень региональнай оргаттнень работаснон эффективностьснонды оценкань максомань итокнень коряс Мордовиясь кафта кизот мельцек сувсесь странаса лидерхнень еткс, - азозе Мордовиянь Оцюнясь. – Тячи минь мушенттама шарьхкодема федеральнай центрать ширде ся кизефкснень коряс, конат сотфт республикать виияфнеманц мархта. Но пингсь аф ащекшни фкя вастса. Инголенк коль эвондакшнихть од и сяда стака задачат. Синь решандамасна ащи сянь эзда, конашкава курокста, профессиональнайста и грамотнайста кармайхть работама министерствань и исполнительнай властень лия государственнай органонь вятихне и должностной лицатне».

Азсаськ, што работать цебярьгофтоманкса нолдаф Указ Мордовия Республикань государственнай властень исполнительнай органонь структурати полафтксонь сувафтомать колга. Сувафтф полафткснень мяльс сявозь исполнительнай властень оргаттнень лувкссна кирсь пцтай колмонь-крда – комсь фкиес (ульсь колмогемонь).

Лядонды 16 министерства, кафта госкомитетт и кафта республиканскяй службат, а стане жа Российскяй Федерациянь Президентть видеса сембе пингонь представительствась.

Пякстаф министерстватнень и ведомстватнень сембе функциясна явовихть властень уликс оргаттнень еткова. Сисем министерстватне арафтовихть лиякс, а кой-конатненди максовихть лия лепт. Тя:

- Жилищно-коммунальнай хозяйствань, энергетикань и населениять гражданскяй ширде араламань министерствась,

- Экономикань, торговлянь и предпринимательствань министерствась,

- Населениять социальнай ширде араламань, трудонь и заняфшинь министерствась,

- Культурань, национальнай политикань, туризмань и архивнай тевонь министерствась,

- Строительствань, транспортонь и дорожнай хозяйствань министерствась,

- Велень хозяйствань и продовольствиянь министерствась,

- Мордовия Республикань Юстициянь министерствась.

Тяда башка, пуроптови тарифнень коряс Республиканскяй службась.

Государственнай торкнень и закупкатнень коряс функциятнень пяшкотькшнеманкса пуроптови «Региональный центр торгов» государственнай казеннай учреждениясь.

Исполнительнай властень 13 оргнть эса полафткст ашесть эвонда. Нят:

- Финансонь министерствась,

- Образованиянь министерствась,

- Здравоохранениянь министерствась,

- Целевой программань министерствась,

- Промышленностень, наукань и од технологиянь министерствась,

- Вирень, охотничьяй хозяйствань и природопользованиянь министерствась,

- Информатизациянь и связень министерствась,

- Печатень и информациянь министерствась,

- Спортонь и физическяй культурань министерствась,

- Од ломаттнень тевснон коряс Госкомитетсь,

- Мордовия Республикань имущественнай и земельнай отношениянь министерствась,

- Республиканскяй ветеринарнай службась,

- А стане жа Постпредствась Москуса.

Сембе министерстватнень и ведомстватнень эса етафтовихть мероприятият структурать, задачатнень и функциятнень ладямаснон коряс.

«Эряви полафтомс отраслевой министерстватнень обязанностьснон стане, штоба кажнайсь эздост лац содальхцень и маштоль вятемост максф тефнень, - китькстазе Владимир Волков. – Касфтови путф задачатнень решандаманкса вятихнень и должностной лицатнень ответственностьсна. Тядде Посланиять эса мон путонь Правительствать инголе задача етафтомс 10 процентонь сокращения властень оргаттнень эса. Етафтф реорганизациять вельде тя задачась кармай пяшкотьф. Тейнек тя максовсь аф теждяста».

Сембоц арьсекшневи кирьфтамс 80 должность (тяконь лувксса 6 госдолжностть и 5 исполнительнай властень органонь вятиень должностть, конат аф арсихть Правительствань членкс).

«Кеман, тя лезды цебярьгофтомс кадровай политикать управлениянь сфераса. Тянкса республикаса пуроптови система, кона кармай касфнема сай пингонь, еню, смузю госслужащайхть, - поладозе Мордовиянь Оцюнясь. – Тянь колга кафта шида тяда инголе кочкаф губернаторхнень мархта васедемать пингста корхтась Россиянь Президентсь В.В.Путин».

В.Д.Волковонь валонзон коряс, республикань руководствать, Правительствать инголе путфт задачатне, конатнень лангса сави работамс маластонь вете кизотнень. Аноклаф действиянь Программа. «Сембонди тейнек путома сонь эряфс етафнеманцты эсь путксоньке. Каждайти эсь вастсонза тиема эсь работац честнайста и качественнайста, кода эряви, и совестьс коре. И эста минь обязательна саттама сатфкст!», - мярьгсь Владимир Волков.

Депутаттне кирдезь МР-нь Оцюнять мархта азф кандидаттнень ширеснон. Мордовия Республикань Оцюнять должностьс путф Владимир Федорович Сушков, МР-нь Правительствань Председательть васенце заместителенц – экономикань, торговлянь и предпринимательствань министрть должностьс – Владимир Николаевич Мазов, МР-нь Правительствань Председательть- велень хозяйствань и продовольствиянь министрть должностьс – Владимир Николаевич Сидоров.

А стане жа МР-нь Правительствань Председательть заместителензон должностьс – Геннадий Петрович Комусовонь и Галина Алексеевна Лотвановать.

Мордовия Республикань Правительствань Председательть заместителенц – целевой программань министрть должностьс – Алексей Николаевич Меркушкинонь, МР-нь Правительствань Председательть заместителенц –

промышленностень, наукань и од технологиянь министрть должностьс – Александр Иванович Сидоровонь, МР-нь Правительствань Председательть заместителенц – финансонь министрть должностьс – Алексей Юрьевич Симоновонь, МР-нь Правительствань Председателть заместителенц – строительствань, транспортонь и дорожнай хозяйствань министрть должностьс – Виктор владимирович Цыгановонь, МР-нь Правительствань Председательть заместителенц – жилищно-коммунальнай хозяйствань, энергетикань и населениять гражданскяй ширде араламань министрть должностьс – Игорь Анатольевич Чадовонь.

МР-са ломанть праванзон коряс Уполномоченнайкс путф Валерий Левин, кона полафтозе тя постса Юрий Ястребцевонь. Сессиять пингста од омбудсменць примазе присягать, мезьда меле теенза максфоль удостоверениясь.

Заседанияса ванфтольхть «О республиканском бюджете Республики Мордовия на 2017 год и плановый период 2018 и 2019 годов» Мордовия Республикань Законти сувафтф полафтксне.

Алексей Симоновонь валонзон коряс, республиканскяй бюджетть эса полафтксне сотфт федеральнай бюджетста дополнительнай поступлениятнень получамаснон мархта.

«Финансовай лезкссь кассь 89 миллион цалковайда, 77 миллионць конатнень эзда – Российскяй Федерациянь Президентть резервнай фондстонза. 50 миллион цалковайсь нолдави республиканскяй инфекционнай больницять зданиянцты капитальнай ремонтонь тиеманкса, 27 миллион цалковайсь – Саранскяйса 2№ идень поликлиникати, 10 миллиотт цалковайсь – инвалид шабатненди льготнай лекарственнай средствань и пчксемань питаниянь максоманкса», - отмечазе А.Ю.Симонов.

218 миллион цалковайда касфтфтольхть карьхцне государственнай учреждениятнень кирдеманкса, тяконь лувксса трудть инкса пандоманкса –

66 миллион цалковай, госдолгтьобслуживандаманкса – 31 миллион цалковай, населениять социальнай обеспечениянкса – 54 миллион цалковай, муниципальнай образованиятнень ширеснон кирдеманкса – 106 миллион цалковай.

Полафткснень мяльс сявозь республиканскяй бюджетть доходнай пяльксоц арась 43 миллард 294 миллион цалковай, расходнай пялькссь – 45 миллард 495 миллион цалковай. Бюджетть дефицитоц ашезь полафта и лядсь 2 миллартт 201 миллион цалковаень лувксса.

Стане жа депутаттне ванозь «О внесении изменений в статью 11 закона Республики Мордовия «О межбюджетных отношениях в Республике Мордовия» законть проектонц.

Получаф средстватне могут нолдавомс муниципальнай образованиятнень территорияснон благоустроендаманкса, местнай назначениянь историянь и культурань памятникнень ванфтоманкса, населениять водоснабжениянкса, автомобильнай китнень строяманкса и кирдеманкса, местнай назначениянь лия кизефкснень решандаманкса.

Азсаськ, што эрь случайста получаф средстватнень тевс нолнемасна кармай решандакшневома муниципальнай образованиянь населениять мархта.

«Тяфта тиендеви Оренбургскяй, Кировскяй, Самарскяй областьса, Пермскяй крайса. Татарстан Республикаса меля самооблажениянь механизмать тевс нолнезь получафоль 183 миллион цалковай». – азозе А.Ю.Симонов.

Народнай избранникне кирдезь МР-нь Счетнай палатань аудиторонь вастти Игорь Сафоновонь кандидатуранц ширенц. Тя должностть сон кармай занцемонза маластонь вете кизотнень.

Сембоц сессияса ванфоль 13 кизефкс, вятезе заседаниять МР-нь Госсобраниять Председателец Владимир Чибиркин.