Вержиста, 19 сентябрьста, Республикань Кудть Колоннай залсонза етась торжественнай мероприятия, кона лемтьфоль «Известия Мордовии» газетать 100 кизонь топодеманцты. Пуромксса примась участия Мордовиянь Оцюнясь Владимир Волков.
Эсь корхтамасонза Владимир Волков китькстазе, што «Известия Мордовии» изданиять историц – тя мокшэрзянь крайть историяц, кона няфтьф газетать лопанзон лангса.
«Изданиясь аф весть полафнезе лемонц, няфнемок странать и республикать общественнай и политическяй эряфсост полафткснень. Но фалу газетась пяк оржаста марьсезе пингть, мольсь эряфть мархта ряцок, эрясь эсь пингонь ломаттнень прябаласнон и сатфксснон мархта, - мярьгсь сон. – Тянь кемокснесазь ламоц казнетне – «Знак Почета» орденць, «Золотой фонд прессы» знаксь и лиятне. Васенце шистокиге газетась сембе ширде няфнесы мокшэрзянь крайть эряфонц. Корреспонденттне фалу ульсть сятнень мархта, кит стряйхть, тонафтыхть, пчкафтыхть, нуйхть и сокайхть. И тячивок изданиять лопанзон лангса азонкшневи од полафткснень, сянь колга, кода эряйхть республикань ломаттне, мезсь синь пичефтьсыне.
—Газетать пара мялезот сявомс кядьс,—мярьгсь В.Д.Волков.—Эсонза аш «рдаз». Серматфонтень эса няеви оцю мяль полафтомс эряфть цебярь шири, пичедема странать и республикать судьбаснон инкса. Изданиять инь оцю козяшиц—авторскяй материалхне, журналистскяй расследованиятне, экономическяй и спортивнай аналитикась, рубрикатне, конат латцихть кеме соткст лувить мархта. Газетать лопанзон лангса эряфс ётафневи лама проект, конат водендафт историять и культурать, экологиять ванфнеманкса, патриотическяй воспитаниять виияфнеманкса. Тяниень пингть тя пяк эрявикс.
Кода азозе республикань Оцюнясь, «Известия Мордовии» газетать школанц ётазь мокшэрзянь ламоц писательхне и поэттне, наукань, культурань и искусствань деятельхне, творческяй киснон ушеткшнезь газетань корреспондентокс.
—Синь полафтозень од, вии команда,—мярьгсь В.Д.Волков.—Ламоц авторхнень оцю работамань опытсна, арсесть лауреаткс республиканскяй и
всероссийскяй профессиональнай конкурснень эса. Колма кизот мельцек «Известия Мордовии» газетань журналисттне арсесть сяськикс «Правда и справедливость» ОНФ-ть конкурссонза. Сяськоманкса кржаль аньцек азондомс событиять колга. Обязательнай условиясь – лездомс ломаттненди, материалонь геройхненди прябаласнон решандамаса. И тинь афкукс лезнеде! – отмечазе В.Д.Волков. – Ломаттнень инь таколфты прябаласнон лангс шарфнемась, оцю мяльсь лездомс теест – тиендьсы газетать лия изданиятнень мархта аф фкя лацоннекс. Спасиба теенть тянкса оцю!
Стане жа Владимир Волков спасибась коллективти общественно-политическяй оцю событиятнень эса активнай участиянь примсеманкса, тяконь лувксса сембе уровенень кочкамань кампаниятнень эса. «Минь марса етаме лама оцю избирательнай кампания, фалу етафнеськ синь лац, - поладозе сон. – Башка мялезе лятфтамс редакциянь сотрудникнень Российскяй Федерациянь Президентть пресс-конференциянзон эса улемаснон. Лац и маштозь арьсеф кизефксонтень вельде Президентть ответонзон эса аф весть кайгсь оцю оценка республикать сатфксонзонды. Тя пяк питни!»
В.Д.Волков поладозе, што изданиять инь оцю подписной тиражец—14 тёжянь экземпляр. Газетась пачфневи республикань сембе райоттненди.
Республикань Оцюнясь китькстазе, што изданиясь вятьсы работанц тячиень вешфкснень мяльса кирнезь. «Известия Мордовиись» республикань изданиятнень ёткста васенцекс нолдазе газетать электроннай версиянц, конань эрь шиня ванондсы 20 тёжяньда лама ломань.
Региононь вятись кошардозе редакциянь коллективть сяда ламоня серматкшнемс труженикнень колга, тонафнемаса и наукаса ломаттнень сатфксснон, производственнай тевса однятнень квалма, шарфнемс мяль мялень кепси кулятненди и тематненди, конат кармайхть интереснайкс од ломаттненди.
—Волонтерствась, благотворительностсь, эрямань цебярь условиянь тиендемась, рабочай од вастонь панчсемась—вов тяфтама тематненди макссема башка васта газетать лопанзон лангса,—мярьгсь В.Д.Волков.—Тейнек эряви тёждяста и шарьхкодевиста пачфнемс од ломаттненди, што эрь ломанти ули кода лац эрямс и работамс эсь республикасонк.
Региононь вятись поладозе, што газетать юбилеец етай республикати мяляфтови кизоня, мзярда Саранскяйсь примазе футболть коряс миронь чемпионатть.
«Анокламась теенза виияфтозе республиканьконь сембе ширде. Полафтсь аф аньцек ошсь, но и сонь ломаненза, синь мяльсна-арьсемасна, - отмечазе Владимир Волков. – Тяфтама оцю событиять лац етафтомац ламода ащесь населенияти информациять пачфнеманц эзда. Журналисттнень работаснон эзда ащесь ся, кода обществась примасы чемпионатть, сянь, мезе тиф.
Благодарностень башка валхт тя шиня азфтольхть ветераттнень лемс, конат лама киза покодсть газетаса, кинь материалсна тячемс лядондыхть оцю профессионализмань примеркс.
Эсь ширденза «Известия Мордовии» газетать главнай редактороц Олег Каштанов спасибась республикань руководствати и лична Владимир Волковонди сембе ширдень лезксонкса.
Стане жа изданиянь коллективть поздравляндазь МР-нь Государственнай Собраниять Председателенц заместителец Валерий Алехин, МР-ть эзга главнай федеральнай инспекторсь Михаил Сезганов.
Тя шиня изданиянь сотрудникне казьфтольхть оцю государственнай казнеса.