11 августста Пензаса Россиянь Правительствать Председателец Дмитрий Медведев етафтсь совещания эряма вастонь строямать виияфнеманц мархта сотф кизефкснень коряс. Совещанияса примасть участия Правительствать Председателенц васенце заместителец Игорь Шувалов, Приволжскяй федеральнай округса Российскяй Федерациянь Президентть полномочнай представителец Михаил Бабич, строительствань и жилищно-коммунальнай хозяйствань министрсь Михаил Мень, региононь вятихне.
Панжемок совещаниять, премьер-министрсь китькстазе,што тефне тя отрасляса мекольдень пингть ушедсть петневома. Стане жа сон отмечазе, што виияфневи эконом-классонь эряма васттнень строямасна.
Дмитрий Медведев азозе, што Правительствась сяда тов работай дольщикненди финансовай пельксть кирьфтаманц коряс – кепотьксонди, аф кунара РФ-нь Президентсь кемокстась граждаттнень-долевой строительствань участникнень праваснон араламань Фондть колга закон.
Строительствань и жилищно-коммунальнай хозяйствань министрсь Михаил Мень азозе, што тяниень пингть мольфтеви работа 2018 кизоня «Стимулирование программ развития жилищного строительства субъектов РФ» подпрограммать эса участвондаманкса субъекттнень кочкамасна. Средстватне явовихть 32 региоттнень еткова 100 проектть эряфс етафтоманкса. Ня проекттнень коряс арьсеви сувафтомс тевс 8 миллиотт квадратнай метра эряма васта, мезсь сяда лама 2017 кизоть коряс.
Мордовиянь Оцюнять аф оцю пингс тевонзон тиендисна Владимир Волков совещанияса тись доклад республикаса эрама вастонь строямань программать эряфс етафнеманц колга. Владимир Волков китькстазе, што региононь правительствать инголе васенце вастса ащи сембе федеральнай жилищнай программатнень эса участвондамась: «Молодая семья», «Устойчивое развитие сельских территорий», «Жилье для российской семьи».
Республикань лидерсь отмечазе «Молодая семья» программать оцю значениянц и социальнай эффектонц. «Программать эряфс етафнемста новоселья Мордовияса отмечасть 11 тежянь семьясь. Тядде максови нинге 700 сертификат. Тя работать эзда ламода ащи демографическяй ситуациясь, и
минь лувондсаськ, што финансированиять тя программать коряс эряви касфтомс сембе странать эзга», - китькстазе Владимир Волков.
Стане жа Мордовиянь вятись китькстазе аварийнай эряма вастста граждаттнень етафтомаснон коряс программать и «Жилье для российской семьи» программать поладомаснон эрявиксшинц.
Ванфтомс эряма вастонь строямань объемтнень Мордовияти ламода удалась 5 процент алу льготнай ипотечнай кредитть вельде. Программась етафневи эряфс омбоце кизось, сонь участникокс арасть ни 3 тежятть ломанць. «Строительнай отрасляти дополнительна инвестировандаф 5 миллиартт цалковай. Тяддень кизоть васенце пялестонза строямань объемтне республикаса кассть 15 процентта. Удалась касфтомс строительнай материалхнень производстваснон, ванфтомс отрасляса кафта тежяньда лама рабочай васта», - азозе Владимир Волков.
Мордовиянь вятись китькстазе, што республикась арьсекшни сяда товга касфнемс эряма вастонь строямань объемтнень, виияфнемс льготнай ипотекать. Маластонь вете кизотнень Мордовияса арьсекшневи строямс 2 миллиотт квадратнай метра эряма васта.
Мордовия Республикань Оцюнять Пресс-службац