3 октябрьста Москуса етась физическяй культурать и спортть виияфнемаснон коряс РФ-нь Президентть видеса Советть и «Оргкомитет «Россия-2018» АНО-ть Наблюдательнай советонц марстонь заседаниясна, конанди председателькс ульсь Россиянь Президентсь Владимир Владимирович Путин. Заседаниянь участникне тисть итокт 2017 кизонь FIFA Конфедерациянь Кубкать етафтоманцты и корхтасть 2018 кизонь FIFA футболть коряс миронь чемпионатти анокламать колга.
Заседаниять ушедомда инголе Владимир Путин ванозе выставкать, кона лемтьфоль 2018 кизонь футболть коряс миронь чемпионатти ошнень-организаторхнень стадионцнон, аэропортснон анокламаснонды. Мордовия Республикать выставочнай стендсонза няфтьфтольхть кафта проектт – «Мордовия Арена» стадионць и Саранск ошень аэропортовай комплекссь. Россиянь Президентсь ванозень чемпионатонь инфраструктурать основной объектонзон макетснон. Мундиальть етафтоманкса регионть анокшинц колга Президентти пачфтсь Мордовиянь Оцюнясь Владимир Волков.
Заседаниять панжемста Россиянь Президентсь макссь оцю оценка Конфедерациянь Кубкати Россияса анокламати и тердсь нолдамс тевс пуроптф опытть 2018 кизонь футболть коряс миронь чемпионатти анокламста.
Стане жа Владимир Путин макссь поручения, штоба кода можна сяда лама ломаненди улель кода повомс чемпионатонь матчненди, штоба сяда лама улель аф питни билетта. Корхтамок объекттнень анокшиснон колга, РФ-нь Президентсь отмечазе: «Минь тяни ваноськ макеттнень, губернаторхнень мархта корхнеме сянь колга, мезсь, коса, кодама состоянияса ащи. Целайнек
няйфсь кепси мяль, но кой-кодама лядондома сякокс ули. Эряви пяк внимательнайста ваномс работань эрь этапть мельге», - китькстазе государствань Оцюнясь.
Региоттнень мундиальти анокшиснон колга заседанияса пачфтсть РФ-нь спортонь министрсь Павел Колобков и «Россия-2018» футболть коряс миронь чемпионатти анокламать и етафтоманц коряс организационнай комитетть генеральнай директороц Алексей Сорокин. Стане жа информация мархта выступандасть РФ-нь транспортонь министрсь Максим Соколов и связень и массовай коммуникациянь министрсь Николай Никифоров.
Корхтамок заседаниянь итокнень колга, Мордовиянь Оцюнясь Владимир Волков отмечазе: «Анокламок чемпионатть етафтоманцты, Мордовиясь пяшкодезень ни арьсеф работатнень оцюшка пяльксснон. Но мекольце тефне сядовок ответственнайхть, тянь башка китькстазе эсь выступлениясонза государствань Оцюнясь. Тейнек аф аньцек кемоста кирдема ладяф графикти, но – работама азф пингть инголязь! Задачатне, конат решандакшневихть чемпионатти анокламатнень рамкаса, пяк оцюфт, токсесазь фкя пингста несколька отраслятнень, тяфтамотнень, кода – транспортсь, связсь, дорожнай хозяйствась, гостиничнай сферась. Сяс минь карматама старандама сувафтомс тевс сембе объекттнень аф аньцек эсь пингстонза, а кадомс мзярошка пинге запасонди проектоньконь сядовок цебярьгофтоманкса, территориятнень благоустройстванкса и стак тов. И, конешна, сембось должен улемс анок тестовай матчнень етафтомаснонды 2018 кизонь апрельти», - китькстазе региононь вятись.
Мордовия Республикань Оцюнять пресс-службац