4 майста Мордовия Республикань Оцюнять тевонзон тиендисна Владимир Волков Кремляса примась участия Государственнай советть и Президентть видеса Россиять социально-экономическяй вииякшнеманц целевой показателензон сатнемаснон мониторингть коряс Комиссиять марстонь заседаниясост, конань вятезе Владимир Путин. Заседаниять пингста ванфтольхть кизефксне, конат сотфт аварийнай эряма вастста граждаттнень етафтомаснон, МФЦ-ть вельде государственнай и муниципальнай услугань макссемать и социальнай сфераса услугаттнень качестваснон аф зависимай оценканц мархта.
Аварийнай эряма васттнень машфтомаснон государствань вятись лемдезе «серьезнайкс, масштабнайкс и миллиотт граждаттненди пяк важнайкс». Президентсь китькстазе, што ламоц российскяй региоттне пяшкотькшнесазь путф задачатнень аф ваномок тячиень стакатнень-сталмотень лангс.
Мордовиясь РФ-нь субъекттнень рейтингсост аварийнай жилой фондста граждаттнень переселенияснон программать коряс занцесы 23 вастть, а ПФО-са – 6 вастть. Программать эряфс етафнемстонза аварийнай кудста, конатнень марстонь площадьсна 94 тежянь квадратнай метра, од эряма вастс етафтф ни 5700 ломань. 2017 кизонди республикань Оцюнять мархта путф задача 1 сентябрть самс машфтомс нинге 23,2 тежянь квадратнай метра аварийнай эряма васта и етафтомс од кудс 1600 лама ломань.
МФЦ-ть вельде государственнай и муниципальнай услугань макссемать колга корхтамста Владимир Путин лемдезе принципиальнай задачакс условиянь тиендемать, штоба странань граждаттненди улель кода получамс услугат любой МФЦ-са, аф ваномок синь эрямань и регистрациянь вастснон лангс. Целайнек странаса работайхть колма тежятть МФЦ, но Президентсь тердезень региональнай власттнень аф лотксемс сатфть лангс.
Мордовияса работай 23 МФЦ (221 вальмя), тяда башка работайхть дополнительнай офист 67 муниципальнай образованиятнень эса (74 вальмя). Владимир Волков аф весть отмечсезе МФЦ-нь сетть сяда товолдонь виияфнеманц эрявиксшинц, путомок Государственнай Собранияти эрь кизонь Посланиясонза задача пачфтемс электроннай видса макссеви услугатнень пяльксснон 60 процентс, а 2018 кизоня – 70 процентс Россиянь Президентть майскяй Указонзон мяльс сявозь.
Мордовия Республикань Оцюнять Пресс-службац