Владимир Волков примась участия Мордовиянь Следственнай управлениять од зданиянц панжемаса

Владимир Волков примась участия Мордовиянь Следственнай управлениять од зданиянц панжемаса

Мордовиянь Оцюнять аф оцю пингс тевонзон тиендисна Владимир Волков 1 августста примась участия МР-ть эзга РФ-нь Следственнай комитетть од зданиянц торжественнай панжемасонза, кона строяф Саранскяйса Васенконь ульцяса.

«Тячи мяляфтови ши, минь панчсаськ Следственнай управлениять од зданиянц. Монь койсон, тя инь цебярь казнесь тинь профессиональнай праздниконтенди. Ломаттне должетт работамс цебярь условияса. Тя минь политиканьке», - мярьгсь Мордовиянь лидерсь.

Владимир Волковонь валонзон коряс, республиканскяй властень и Следственнай комитетонь руководствась путсть лама вий, штоба тя проектсь етафтоволь эряфс.

«Республиканскяй Следственнай управленияти удалась сатомс оцю сатфкст работаса. Кеман, што анокшинь оцю уровенць, эсь тевонь лац содамась лездыхть следствиянь сотрудникненди сатнемс сядовок оцю результатт», - мярьгсь МР-нь Оцюнять аф оцю пингс тевонзон тиендисна.

Стане жа Владимир Волков арьсесь кеме шумбраши, благополучия и сатфкст аф теждя, но обществати пяк эрявикс работасост.

МР-ть эзга СКР-нь СК-ть вятиенц аф оцю пингс тевонзон тиендисна Эдуард Новаковский азсь благодарностень валхт Мордовиянь руководствати и лична Владимир Волковонди. «Минь работаньке водендаф республикать цебярьста эряманкса. Надияфтан, Следственнай управлениясь путсыне сембе виензон, штоба пяшкодемс ся задачатнень, конат путневихть ведомстваньконь инголе», - мярьгсь сон.

Якстерь сералнять керомда меле оцю инжихне ванозь зданиять помещениянзон. Владимир Волковонди няфтезь тяниень пингонь криминалистическяй техникать возможностензон, а стане етафтсть аф оцю экскурсия управлениять эзга, конань пингста содафтозь сотрудникнень работамань условияснон мархта.

Зданиять строяманкса карьхцяф 100 миллион цалковай, а сонь марстонь площадец 3,5тежянь квадратнай метра. Зданиять эса ащи Следственнай управлениять аппаратоц и кафта следственнай отделхт. Эрь сотрудникть сонцень башка кабинетоц, ули стане жа криминалистическяй класс, актовай и

тренажорнай залхт, а стане жа помещеният, конат водендафт вещественннай докозательстватнень, архифнень, оружиять и лама мезть лиять ванфтоманкса.