2017 кизонь 29 сентябрьста Пензаса Мордовия Республикань Оцюнясь примась участия ПФО-са РФ-нь Президентть полномочнай представителенц видеса Советть заседанияса, конанди председателькс ульсь Михил Бабич. Округонь Советть пингста заседаниянь участникне – федеральнай и региональнай структурань вятихне, РФ-нь субъекттнень, конат сувсихть ПФО-ть составс, оцюнясна, ПФО-са РФ-нь Президентть полномочнай представителенц аппаратонц главнай федеральнай инспекторонза, общественнай организациянь представительхне – корхтасть округонь региоттнень экономикаснон виифнемаснон, налоговай потенциалть касфнеманц и межбюджетнай отношениятнень цебярьгофнемаснон колга.
Советть заседанияса примасть участия Российскяй Федерациянь финансонь министрсь Антон Силуанов, РФ-нь промышленностень и торговлянь министрть заместителец Василий Осьмаков.
Заседаниять панжемста Михаил Бабич поздравляндазень 10 сентябрьста кочкаф региононь вятихнень, конатнень лувксса азфоль и Мордовиянь Оцюнясь Владимир Волков, арьсесь губернаторхненди цебярь работа тяфтама ответственнай посттнень эса.
Корхтамок шинь повесткать коряс ПФО-са РФ-нь Президентть полномочнай представителец отмечазе региоттнень экономическяй касонодоманкса-вииякшнеманкса федеральнай и региональнай уровеньца етафневи работать эрявиксшинц.
«Тефне сталгофневихть сянь мархта, што федеральнай законодательстваса полафтксне или федеральнай уровеньца примсеви решениятне вятнихть региоттнень расходнай обязательстваснон касондомаснонды. Тянь мархта ряцок решениятне эрявикст граждаттнень эряфснон кувалгофнеманкса и
эрямань условияснон цебярьгофнеманкса, а лисенди, вешихть финансовай ресурст», - мярьгсь Михаил Бабич.
Михаил Бабичень валонзон коряс, примафт эрявикс решеният лафчста обеспечендаф и социальнай ширде аф аралаф граждаттнень эрямань условияснон цебярьгофнеманкса, трудть инкса инь емла пандомать касфнеманкса.
«Мекольдень кафта кизотнень МРОТ-сь касфневсь колмоксть. Тяка пингть региоттненди макссеви лезкс тяфтама решениятнень примамста. Тядде государствань Оцюнясь путсь задача Российскяй Федерациянь Правительствать инголе пачфтемс МРОТ-ть 2019 кизоти прожиточнай минимумть коряс аф сяда емла уровеньц: 2018 кизонь 1 январьста сявомок – прожиточнай минимумть эзда 85 процентс, а 2019 кизонь 1 январьда аф сяда поздна – тиемс МРОТ-ть фкя лацоннекс прожиточнай минимумть мархта», - поладозе ПФО-са РФ-нь Президентть полномочнай представителец.
Межбюджетнай отношениятнень цебярьгофнемаснон колга доклад мархта заседанияса выступандась Россиянь финансонь министрсь Антон Силуанов. Сон лятфтазе, што тяниень пингть РФ-нь Госдумаса лихневи ваномс 2018-2020 кизотненди бюджетть проектоци отмечазень васенце задачатнень: «Кирдемс населениять афкуксонь доходонзон касомаснон ширенц, виияфнемс экономическяй ширдень касомать. Минь ученттама тяддевок и сай кизотьке кафта процентта лама касома эрь кизоня», - азозе финансонь министрсь.
Советть заседанияса тифоль анализ округть территорияса развитиянь институттнень работаснонды, максф оценка экономическяй ширдень касондомати синь путксснонды. Тянь коряс Пензенскяй областень губернаторть, Советонь рабочай группать вятиенц Иван Белозерцевонь докладсонза Мордовиясь азфоль ПФО-нь региоттнень лувксса, коса отмечсеви валовай региональнай продуктать инь оцю касомац.
Тяда башка, Советть итоговай докладсонза Мордовиясь отмечафоль, кода регион, кона няфни 2017 кизоть васенце пялестонза касома промышленнай производстваса (112 процент мелянь тяка пингть коряс), округса инь цебярь касома велень хозяйстваса (104,2 процент) и строительнай работатнень объемснон касоманц (117 процент).
Тяда башка, Мордовиясь сувси вете региоттнень еткс, коса азф пингста кассть населениять афкуксонь доходонза, а стане жа ПФО-нь ниле региоттнень еткс, коса кассть инвестициянь объемтне .
Тиф анализсь, заседаниянь участникнень мяльснон коряс, няфнесы, што региоттнень экономикасна лисенди кризисста и стякшни касомань-вииякшнемань ки лангс.
Корхтамать коряс заседаниянь участникне анокласть рекомендацият РФ-нь Правительствати, РФ-нь Экономическяй развитиянь министерствати и Финансонь министерствати, а стане жа ПФО-нь региоттнень исполнительнай властень органцнонды.
Мордовия Республикань Оцюнять пресс-службац