Мордовиянь Оцюнясь Владимир Волков 20 сентябрьста Кремляса примась участия Россиянь Президентть региононь одс кочкаф оцюнятнень мархта васедемасонза.
Васедемать панжемста Владимир Путин отмечазе, што 10 сентябрьста етафтф губернаторонь кочкаматнень результатсна кепсесазь мяленц, сяськсть кандидаттне, конатнень ширеснон сон кирнезе. Субъектонь кочкаф оцюнятнень ламошкасна получазь вайгяльхнень 60 лама процентснон. Лятфтасаськ, Владимир Волковонь инкса вайгяльснон максозь кочкаматненди сайхнень 89,19 процентсна. Кода китькстазе Президентсь, тя оцю доверия и тяка пингть – ломаттнень, конат састь избирательнай участкатненди, оцю учендомасна. «Ламось тиф ни, сядовок оцю тефт ащихть инголе. Улихть сатфкст здравоохраненияса, жилищно-коммунальнай хозяйстваса, образованияса», - мярьгсь Владимир Путин.
Государствань Оцюнясь отмечазе, што кочкаф губернаторхнень еткса улихть кода оцю опыт мархта ломатть, стане и од поколениянь представительхть, конатнень лангса ащи сядовок оцю ответственность эсь регионцнон эса тефнень петнемаснон коряс. Стане жа Президентсь китькстазе, што кочкаф оцюнятнень од командаснон пуроптомасна должен етамс панжада и шарьхкодевиста, штоба од ломаттне няелезь, што социальнай лифттне работайхть, а синь профессиональнай касомасна сотф, васендакиге, синь личнай деловой качестваснон, работама маштомаснон мархта.
Владимир Путин корхнесь васедемань участникнень мархта сяда товолдонь работать колга и азсь надияма, што кочкаф оцюнятне нолдасазь тевс сембе маштомошиснон, опытснон и вийснон ся задачатнень решандаманкса, конат эрявикст региоттнень виияфнеманкса.
Мордовия Республикань Оцюнять Пресс-службац