Мордовиянь Оцюнясь Владимир Волков 17 январьста примась участия Саранскяй духовнай семинариять Попечительскяй советонц заседанияса, кона Саранскяй и Мордовскяй митрополитть Зиновиень председательстванц ала етась Республикань Кудса. Корхтамась мольфтевсь Саранскяй православнай духовнай училищать, кона работай Мордовияса 1997 кизоста сявомок, духовнай семинариянди етафтоманц колга.
Попечительскяй советти сувсихть бизнес-сообществань представительхть, республикань вузонь, оцю промышленнай предприятиянь вятихть. Советть заседанияс стане жа тертьфтольхть Мордовиянь исполнительнай властень органонь и муниципальнай образованиянь представительхне, Государственнай Собраниянь депутаттне. Эсь корхтамасонза республикань Оцюнясь китькстазе Мордовияса духовнай образованиять виияфнеманц и сай пингонь пастырьхнень анокламаснон эрявиксшинц. «Светскяй и духовнай властть задачасна – козякофтомс сай пингонь семинариять потмоширде, кона лезды анокламс храпненди и прихоттненди священникт, а синь эсь ширдест арайхть традиционнай христианскяй добродетельхненди афкуксонь вятикс. Кеман, оцю квалификациянь кадратненди, конат аноклавихть Саранскяй духовнай семинарияса, вешфкс кармай аф аньцек Мордовияса, но и эздонза ширеса», - отмечазе Владимир Волков.
Стане жа заседанияса пуроптфоль Попечительскяй советть Саранскяй духовнай семинариять научно-методическяй козяшинц виияфнеманц и кемокснеманц коряс комиссияц. Попечительскяй советти почетнай председателькс кочкафоль Владыкась Зиновий, а председателькс – «Талина» агрохолдинкть президентоц Виктор Бирюков.