Мордовиянь Оцюнясь Владимир Волков 7 декабрьста примась участия торжественнай мероприятияса, кона лемтьфоль Российскяй Федерациянь Конституциять 25 кизонь топодеманцты. Пуромкссь етась Республикань Кудть Оцю залсонза.
Собраниянь участникнень поздравляндамста, МР-нь Оцюнясь китькстазе, што Российскяй Федерациянь Конституциять 25 кизонь топодемац – тя события, кона панжезе странать эряфса од эпохать. «25 кизода инголе народсь максозе вайгяленц государствать марстоньшинц, законность и справедливость, странать касондоманц- вииякшнеманц инкса,- мярьгсь сон. – Конституциясь «шачсь странати стакадонга стака пингста. СССР-ть срадомац-каладомац эвондафтсь крхка кризис, ашуши».
Владимир Волков отмечазе, што 1990-це кизотнень ушетксста Мордовиясь ламоц показательхнень коряс занцезень мекольце васттнень Российскяй Федерацияса. Аньцек 1994 кизонкса валовай региональнай продуктась кирсь 40 процентта. Ламоц промышленнай предприятиятне лоткасть. Ломаттненди ковонь ашесть панне заработнай плата.
«Обществаса азорондась пелема, касондсь преступностсь. Арьсян, пцтай сембе, кие тячи озаф залса, пелема мархта лятфнесазь республикати и марнек странати ся стака пингть, - поладозе В.Д.Волков. – Сонць эряфсь вешсь полафткст. Эрявсь мрдафтомс властти надиямать, эреклафтомс ломаттнень цебярьс верондамаснон».
Мордовиянь Оцюнясь отмечазе, Российскяй Федерациянь од Конституциять примамац вешсь региоттнень законодательнай системаснон одкстопнеманц. Пцтай эстокиге ушетфоль Мордовиянь Конституциять анокламац, кона примафоль 1995 кизонь 21 сентябрьста. Сонь юрсонза ащи странаньконь главнай закононц лаца принципсь.
«Васендакиге, Мордовияса ладяфоль марстонь работа федеральнай центрать мархта, муфоль шарьхкодема обществать мархта, - китькстазе Владимир Волков. – Марса правоохранительнай оргаттнень мархта удалась машфтомс организованнай преступностть, касфтомс целайнек безопасностть. Но работась тянь коряс аф лафчепнема тянивок. Аш кода нолдамс 90-це кизотненди мрдамать, мзярда ломаттне пельсть лисемс ульцяв».
Лама вийда эрявкстсь, штоба араламс предприятиятнень, обеспечендамс ломаттнень работаса и цебярь зарплатаса, эреклафтомс промышленностть и велень хозяйствать, нолдамс эзост од ваймопожф.
«Удалась лоткафтомс срадомать-каладомать, ладямс касома экономикаса, сатомс сатфкст социальнай сфераса. Кепотьксонди, тячи социальнай политикать лангс бюджетнай карьхцнень талекасна арась 60 процент, мезсь пцтай кафтонь-крда сяда лама 1993 кизонь показательхнень коряс, - азозе МР-нь Оцюнясь. – Сембось тя лездсь ладямс республикаса шарьхкодема. Мордовиясь няфтезе прянц политическяй ширде стабильнай и инвестиционнай ширде мялень шарфни регион».
В.Д.Волков лятфтазе, што мекольдень кизотнень минь регионцонк етась всероссийскяй и международнай уровенень лама мероприятия. Мордовиять историяса од этапокс арась футболть коряс миронь чемпионатсь. Анокламась теенза макссь касома эряфонь сембе ширетнень эса.
«Планоньконь пяшкодемаса оцю лезкс макссь странань руководствась. Благодарностень башка валхт мялезе азомс Российскяй Федерациянь Президентти Владимир Владимирович Путинонди! Тейнек пяк питни республиканьконь лангс сонь мялень шарфнемац, - мярьгсь Владимир Волков. – Оцю питне макссетяма Президентть Администрациянц и Россиянь Правительствать, ПФО-са Президентть полномочнай представителенц, Государственнай Думань Федерациянь советь мархта сотрудничендамати».
Мордовиянь Оцюнясь китькстазе, што сяськондемс сталмотнень удалась государственнай и хозяйственнай вятихнень тевти ответственностень марязь малаткшнемаснон вельде. Властти нажядема вастокс ульсть и лядондыхть ошень, райононь и велень оцюнятне, конат инь малат ломаттненди.
Корхтамок регионть сяда товолдонь касондоманц-вииякшнеманц колга, Мордовиянь Оцюнясь шарфтсь мяль, што 25 кизоста Российскяй Федерациянь Конституциясь арась фундаментокс и тяка пингть кемотть кизос инголи странать касондомаса юркс.
«Тя пингста минь марса етаме оцю и стака ки, лама мезе сатоме. Но инголе минь учендсамазь аф сяда теждя работа. Од задачат инголенк путни «О национальных целях и стратегических задачах развития на период до 2024 года». Маластонь кота кизотнень тейнек мархтонтт лама тиема экономикаса, инфраструктураса, социальнай сфераса. Тя афкуксонь историческяй задача, - шарфтозе пуромфнень мяльснон В.Д.Волков. – Маластонь кизотнень тейнек эряви касфтомс Мордовиянь населениять лувксонц, ломаттнень зарплатаснон.
Эряви пуроптомс конкуренциянь кирни цифровой экономика, кона кармай работама ломанть лангс. Пяшкодемс ня задачатнень ули кода аньцек цебярь кадратнень, од технологиятнень, отькорь ломаттнень вельде. Тейнек эряви ванфтомс семботь, мезе сатф, молемс инголи. Арьсян, минь сембось лиси!»
Выступлениянц шумордамда меле Владимир Волков макссь государственнай оцю казнет Мордовия Республикать инголе оцюдонга оцю заслуганкса.
Тяфта, Славань II степенень орденца казьф МР-нь Государственнай Собраниянь депутатсь, Н.П.Огаревонь лемса МГУ-нь ректорсь С.М.Вдовин. Здравоохраненияса оцюдонга оцю сатфксонь сатнеманкса Славань III степенень орденца казьф Республиканскяй онкодиспансеронь главнай врачсь Геннадий Мельцаев.
Отмечафт кемгафтувоце СССР-нь кемгафтувоце созывонь народнай депутаттне, конат примасть участия РФ-нь Конституциять анокламаса. «За заслуги перед Республикой Мордовии» медальса казьфт трудонь ветеранць Алексей Кондратьев и Н.П.Огаревонь лемса МГУ-нь аналитическяй химиянь кафедрань заведующайсь Анатолий Осипов.
Республикат социально-экономическяй касондоманцты-вииякшнеманцты путксонь путоманкса и законотворческяй тевса активнай участиянь примаманкса «За заслуги перед Республикой Мордовия» казьф историческяй событиянь участницась, кона максозе вайгяленц РФ-нь Конституциять примаманкса 1993 кизонь 12 декабрьста, - РСФСР-нь кемгафтувоце созывонь (1990-1993 кизоня) народнай депутатсь, «Воля» ООО-нь Зубово-Полянскяй отделениянь техниксь-осеменаторсь Нина Тюрькина.
Регионть банковскяй системанц виияфнеманцты личнай путксонь путоманкса «Лауреат премии Главы Республика Мордовия» званиясь максф трудонь ветеранти Александр Тренькинонди, кона каршек валса азсь благодарностень валхт республикань руководствати и лична Владимир Волковонди трудонцты оцю оценкань максоманкса, и поладозе, што получаф средстватнень прважасыне онкологическяй урмаса сяряди иттнень ширеснон кирнеманц коряс фонду.
Государственнай оцю казнеда башка, Владимир Волков кунардонь койс коре макссь республикань школьникненди Российскяй Федерациянь гражданинонь паспорт и лятфнембяленди казнет.