Мордовия Республикань Оцюнять аф оцю пингс тевонзон тиендисна Владимир Волков 20 июньцта Россиянь Президентть региональнай приемнайсонза етафтсь граждаттненди личнай прием. Региононь вятити лезксонкса сашендсть Саранскяень, Рузаевкань, Ардатовскяй, Лямбирскяй и Краснослободскяй райононь эряйхне. Обращениятнень коряс сяда курокста работаманкса приемс тертьфтольхть МР-нь Правительствать Председателенц заместителец Галина Лотванова, Саранск ошень округонь оцюнясь Петр Тултаев, профильнай министерствань вятихне.
Ардатовскяй райононь Тургенева поселкань эряйхне эняльдсть лездомс фкя ульцяса кить строямасонза. Владимир Волков путсь задача тиемс сембе эрявикс дорожнай работатнень тядде ни.
Эрямань од секторть газификациянц коряс эняльтькс мархта республикань вятити сашендсть Атемаронь эряйхне. Тянкса, кода отмечафоль, эрявихть оцю средстват, сяс Владимир Волков примась решения етафтомс газификациять несколька этапса, аф фкя лацонь целевой программатнень эряфс етафнемаснон рамкаса. Газификациять коряс работати кярьмодеви тядде ни.
Куд пирьфть благоустройстванц коряс эняльтькс мархта сашендсть Саранскяень лама квартираса фкя кудть эряенза: эряви идень площадка, машинань путнемс вастт. Кизефкссь ули решандаф – надияфтсь Владимир Волков: 2016 кизонь избирательнай кампаниять итогонзон коряс республикась получась средстват «Единая Россия» партиять проектонц коре ошень территориятнень благоустройстванкса. Марса Саранскяйса тядде ремонт тиеви пцтай сяда куд пирьфонди. Тя обращениять сявомс контроль алу мярьгфоль Саранск ошень оцюняти Петр Тултаевонди.
Сембе эняльдематнень коряс примафтольхть решеният, конат кеподезь заявительхнень мяльснон.
Мордовия Республикань Оцюнять Пресс-службац