24 майста Саранскяйса етайхть Технопаркть Научно-техническяй советонц заседаниянц рамкаса мероприятият. Заседаниять эса участиянь примаманкса Мордовияв сась региональнай экономическяй интеграциянь кизефкснень коряс Россиянь Президентть советникоц Сергей Глазьев, а стане жа содаф российскяй ученайхне, РАН-нь академикне: Технопаркть Научно-техническяй советонц председателец, «Всероссийский научно-исследовательский институт авиационных материалов» ФГУП-ть генеральнай директороц, РФ-нь государственнай научнай центрань Ассоциациять президентоц Евгений Каблов, «Санкт-Петербургский национальный исследовательский университет информационных технологий, механики и оптики» ВО-нь ФГАОУ-ть ректороц Владимир Васильев, «Научно-исследовательский институт молекулярной электроники» АО-ть генеральнай директороц, «РТИ Микроэлектроника» ЗАО-ть генеральнай директороц, директоронь советть председателец, «Микрон» ПАО-ть генеральнай конструктороц Геннадий Красников, «Российский фонд фундаментальных исследований» ФГБУ-нь советть председателец Владислав Панченко.
Мордовиянь Оцюнять нюрьхкяня пингс тевонзон тиендисна Владимир Волков содафтозе Сергей Глазьевонь и Научно-техническяй советонь члеттнень республиканскяй инновационнай научно-производственнай кластерть мархта, сянь, кода етафневи эряфс Мордовияса пуроптф образовательно-производственнай «уськоняс» - «школась – вузсь – технопарксь».
Васенцекс НТС-нь участникне ульсть Асу шабанди Республиканскяй лицейса. Тяса инжихне ванозь учебнай лабораториятнень работаснон, корхнесть преподавательхнень и тонафнихнень, международнай предметнай олимпиадань сяськихнень и призерхнень мархта.
Владимир Волков китькстазе: «Асу шабатнень мархта работась республикаса мольфтеви фалу. Лицейсь арась республикати инновационнай площадкакс, коса тонаткшневихть тяниень пингонь од методикатне, конат макссихть возможность аськолямс фкя пильгс пингть мархта, аноклакшнемс выпускникт отраслятненди, конат вешевихть тячиень экономикать мархта».
Тонафнемань заведениять результатонза эвондафнихть гордость. Кафта кизот мельцек лицейсь занцезе омбоце вастть «500 лучших школ России» рейтингса.
Технопарконь Научно-техническяй советть участниконза ванозь Мордовскяй государственнай университетть, ванозь физикань и химиянь институтть математикань и информационнай технологиянь факультетонц. Башка мяль инжихне шарфтсь волоконнай оптикань лабораториять работанц лангс. Тя ширесь республикаса ащи васенце вастса, Мордовиясь отраслять виияфнеманц коряс васенцесь странаса. Саранскяйса 2015 кизоста сявомок работай оптическяй волокнать производстванц коряс Россияса фкя и тяка заводсь. Кода отмечазе Владимир Волков, тя эсь лацонь производстваса тяниень пингть работайхть Мордовскяй госуниверситетонь выпускникне, тяконь лувксса физикань и химиянь институтонь аделайхне. Волоконнай оптикань лабораториясь панчфоль 2012 кизоня, хуш сонць работась тя ширеса мольфтеви лама киза ни , институтсь кирди сотрудничендамань соткст РАН-нь волоконнай оптикань Научнай центрать мархта.
Тяда меле ванфоль оптическяй волокнать производстванц коряс заводсь. Предприятиять генеральнай директороц Андрей Николаев етафтсь инжихненди экскурсия и азондсь работаснон колга.
Предприятиять продукцияц етазе тестированиянь программать и получазе соответствиянь сертификатть. Тячи Мордовияста оптическяй волокнась пачфневи Китаи и Евросоюзонь странатненди.
Технопаркса Советонь участникне ванозь инновационнай проектонь выставкать. Тяконь лувксса эсь разработканзон тяса няфтезень Мордовия Республикань нанотехнологиянь и наноматериалонь Центрась. Оцю мяль шарфтфоль кремниень карбидть производстванц коряс проектть лангс, конань оцю значенияц силовой электроникать и радиоэлектроникать виияфнемаса. Мордовияса сонь эряфс етафнеманксонза ладяф целай научно-производственнай «уськоня», коза сувсихть университетсь, «Электровыпрямитель» заводсь и республиканскяй технопарксь. Тяниень пингть, кода азозе Владимир Волков, республикаса ладяф кремниень карбидть опытно-промышленнай производствац, путневи задача тя материалть промышленнай производстванц лангс.
Стане жа инжихне ванозь идень технопаркть – научно-техническяй направлениянь дополнительнай образованиянь од площадкать. Лятфтасаськ, меля Мордовиясь сувась странань 17 региоттнень лувксс, конатненди максфтольхть средстват идень технопаркнень панжеманкса. 56 миллион цалковайсь федеральнай бюджетста и 24 миллион цалковайсь республиканскяй казнаста макссть возможность рамамс эсь лацонь оборудования и тиемс шабатненди исследованиянь етафнеманкса афкуксонь лабораторият. Тя лазернай технологиятне, биотехнологиясь, альтернативнай энергетикась, роботостроениясь, компьютернай технологиятне.
Сергей Глазьев интерес мархта ванозень идень технопаркть лабораториянзон, или квантумтнень, кода синь тяса лемнесазь. Сембоц эздост сисем, фкясь конатнень еткста эсь лацонне: «Лазерные технологии» лаборатория аш странань фкявок технопаркса. Россиянь Минобразованиясь кирдезе сонь панжеманц коряс республикать мяленц сяс, мес Мордовияса виияфневи волоконнай оптикась и оптоэлектроникась. И оптическяй волокнать производстванц коряс странаса фкя и тяка заводсь работай Мордовияса.
Мордовия Республикань Оцюнять Пресс-службац